PKK bu gün silahları təhvil verir - Türkiyə qalib gəldi!
Türkiyədə uzun illərdir davam edən terrorla mübarizə prosesində mühüm bir mərhələ yaşanır. “Terrorsuz Türkiyə” quruculuğu çərçivəsində, bir zamanlar regionda təhlükə mənbəyi kimi tanınan PKK terror təşkilatının keçmiş üzvləri silahları yerə qoymağa başlayıblar. İraqın şimalında, Süleymaniyə şəhərində baş tutan bu proses, həm yerli, həm də beynəlxalq müşahidəçilərin nəzarəti altında həyata keçirilir. Keçmiş PKK tərəfdarlarının bildirdiyinə görə, bu addım təşkilatın lideri Abdullah Öcalanın iyunun 19-da verdiyi çağırış əsasında atılıb. Təhvil verilən silahlar Milli Kəşfiyyat Təşkilatının nəzarəti altında məhv edilir. Bu hadisə, bölgədə sülh və sabitliyə gedən yolda atılan önəmli bir addım kimi qiymətləndirilir. Bəs həqiqətən PKK-nın bütün qolları tərksilah olacaqmı?
Mövzu ilə bağlı politoloq Natiq Miri Crossmedia.az-a açıqlama verib:
“Bu gün PKK-nın silahı yerə qoymaq prosesinin başlanğıcı günüdür. PKK-ya inanaraq bütün proses onların ixtiyarına buraxılmayacaq. Bunun üçün Türkiyə təşkilatının başçısı Şimali İraqdadır və bu proses kordinasiyalı şəkildə həyata keçirilir. Silahı yerə qoyan bütün terrorçuların silahları yandırılır. Həmin terrorçular haqqında veriləcək qərarlar ciddi yoxlanış keçirildikdən sonra mümkün olacaq. Yəni böyük cinayətlərdə iştirak etməyən, ciddi terror hadisələrində iştirak etməyə terrorçular əfv edilə bilər. Ancaq bu o demək deyil ki, hər şey rahat və rəvan gedəcək. Çünki bu prosesə mane olmaq istəyən qüvvələr var və bu qüvvələrin başında İsrail durur. Eyni zamanda PKK-nı dəstəkləyən Almaniya, Fransa kimi Avropa dövlətləri də var. O baxımdan bu proses ağrılı keçəcək”.
Politoloq həmçinin qeyd edib:
“Bir nüans da var ki, bu terror təşkilatı sadəcə Türkiyəyə yönəlmiş PKK dan ibarət deyil. PKK-nın İraq, İran və Suriya qolları da var. Belə qollardan ən təhlükəlisi də Suriyada olan YPG, PYD terror təşkilatıdır ki, onlara qondarma Suriya qüvvələri adı qoyaraq ABŞ onlarla əməkdaşlıq edir. Adını da İŞİD-ə qarşı mübarizə aparan qüvvələr qoyub. Bu beynəlxalq səviyyədə müəyyən dəstək də qazanır. Başda İsrail olmaqla bəzi qüvvələr Suriyanın şimalında bu silahlı qüvvələrin tərki silah prosesinə təslim olacağı narahatlığı var. Bu yöndə Suriyadakı terrorçuların açıqlamaları var. Konkret şərtlər ortaya qoyublar ki, bu şərtlər nə Türkiyəyə nə də yeni Suriya hökümətinə uyğun deyil. Eyni zamanda PKK-nın İranda Pejak adlanan bir qolu da var. Pejak İrana qarşı hazırlanmış olan terrorçu ünsür olsa da İran bu terrorçulardan Türkiyəyə qarşı istifadə edib. Ona görə İran qolu ilə bağlı da müəyyən problemlər yaşana bilər. Ola bilsin ki, bu müəyyən zaman ala biləcək bir prosesdir. Amma mən inanıram ki, bu prosesin nəticəsində terrorsuz bir Türkiyə terrordan canını təmamilə xilas edəcək”.
Ayhan
14:15 11.07.2025
Oxunuş sayı: 12534
