“Rusiya bataqlığa düşüb və vəziyyətdən çıxa bilmir”
Rusiya Prezidenti Vladimir Putin son müsahibəsində ölkəsinin ABŞ ilə uzun illər ərzində formalaşmış xüsusi və dostluq münasibətlərinə diqqət çəkib. O, qeyd edib ki, Rusiya tarix boyu ABŞ-nin mühüm tarixi dönəmlərində — həm müstəqillik uğrunda mübarizəsində, həm də vətəndaş müharibəsində — dəstək göstərib. Putinin sözlərinə görə, bu ortaq maraqlar və qarşılıqlı anlayışlar iki ölkə arasında zaman-zaman əməkdaşlıq ruhunu gücləndirib.
Mövzu ilə bağlı Crossmedia.az-a açıqlama verən beynəlxalq məsələlər üzrə ekspert Əziz Əlibəyli bildirib ki, Rusiya hazırda ciddi şəkildə geosiyasi bir bataqlığa saplanıb və bu vəziyyətdən çıxmaq getdikcə çətinləşir:
"ABŞ-nin birbaşa iştirakı olmasa da, Avropanın dörd əsas ölkəsinin birgə yaratdığı güclü baza – maliyyə, silah və yardım mexanizmi sayəsində Ukrayna ayaqda qalmağı bacardı. Görünən odur ki, bu model artıq Avropa İttifaqı çərçivəsində genişləndiriləcək; bu, Rusiyanın gələcək narahatlıqlarını daha da artıracaq. Həmin istiqamətdə Avropanın siyasi iradəsi möhkəmlənib və bu proses davam edəcək. Rusiya isə nə qalib gələ bilir, nə də geri çəkilə bilir. Nəticədə digər daxili və xarici problemlər də üzə çıxır və Kreml bu məsələlərlə eyni zamanda məşğul olmaq məcburiyyətində qalır. Rusiya artıq bir neçə bölgədə ciddi itki verib. Buna görə, Suriya məsələsində də geri çəkilməyə məcbur oldu. Faktiki olaraq, həm hərbi, həm də diplomatik baxımdan meydandan sıxışdırılıb. Müttəfiqi olan İran da zərbə alıb, amma Rusiya buna cavab verəcək gücdə olmayıb. Heç bir reaksiya göstərə bilməyib. Bu vəziyyətlər fonunda Moskva daha da təcrid olunur. Bütün bu geopolitik proseslərin fonunda Rusiya çalışır ki, ABŞ-la olan münasibətlərdə əvvəlki tərəfdaşlıq nüanslarını yada salsın və bir növ Vaşinqtonu “borclu” çıxarsın. Bu onlara xatırladır ki, tarix boyu sizin mövcudluğunuzun təmin olunmasında biz əsaslı dəstək vermişik. İndi isə gəlin yenidən razılaşaq, ortaq dil tapaq. Axı bizim keçmişdə müəyyən praktiki əməkdaşlığımız olub. Bu cəhdlər bir tərəfdən Rusiyanın çıxılmaz vəziyyətini göstərir, digər tərəfdən isə onun strateji baxımdan yeni istiqamətlər tapmaqda aciz qaldığını sübut edir”.
Fidan Qarayeva
21:20 07.07.2025
Oxunuş sayı: 11555
