Baş Prokurorluq: Ziyəddin Səfərov işgəncələr nəticəsində Rusiya hüquq-mühafizə orqanlarının avtomobilində ölüb
Ziyəddin Səfərov hadisə günü səhər saatlarında Rusiya hüquq-mühafizə orqanlarının avtomobilində ölüb.
Crossmedia.az bildirib ki, Baş Prokurorluğun İstintaq idarəsinin rəisi Nemət Əvəzov iyulun 2-də Baş Prokururluqda Rusiyada qətlə yetirilən azərbaycanlılarla bağlı cinayət işinin açılmasına dair keçirilən mətbuat konfransında məlumat verib.
Onun sözlərinə görə, iyunun 27-də Azərbaycan vətəndaşlarını Rusiyanın hüquq-mühafizə orqanlarının qətlə yetirməsi faktı ilə bağlı araşadırma başlanılıb:
"İlkin araşdırma zamanı məlum olub ki, Rusiya hüquq-mühafizə orqanlarının keçirdikləri əməliyyat nəticəsində azərbaycanlılar saxlanılıb. Həmin vaxt onlara ağır xəsarətlər yetirilib. Ziyəddin Səfərov isə həmin gün səhər saatlarında Rusiya hüquq-mühafizə orqanlarının avtomobilində ölüb".
Baş Prokurorluğun İstintaq idarəsinin müstəntiqi Pərviz Cəlilov isə bildirib ki, Ziyəddin Səfərov Rusiya hüquq-mühafizə orqanlarının avtomobilində işgəncəyə məruz qalıb: "İstintaq zamanı zərərçəkən şəxslərin yaxınları zərərçəkən kimi tanınıb. Saxlanılan şəxslərlə bağlı əməliyyat istintaq hərəkətləri keçirilib. Ziyəddin Səfərov iyunun 27-də yaşadığı evdən çıxarılıb, həmin vaxt onun üzərində xəsarət izi olmayıb. O, evdən çıxarılandan Rusiyanın hüquq-mühafizə orqanlarının işgəncəsinə məruz qalıb".
Müstəntiq həmçinin vurğulayıb ki, Rusiya KİV-lərində onların ölümü ilə bağlı müxtəlif səbəblər göstərilib: "Meyitlər müayinə olunan zaman onlarda çoxsaylı xəsarətlər, sümüklərin sındırılması və digər xəsarət izləri müəyyən olundu. Ekspertiza zamanı müəyyən edildi ki, onlar saxlanılan və aparılan zaman çoxsaylı fiziki xəsarətlər alıblar. Məhz Hüseyn və Ziyəddin Səfərov qardaşları həmin xəsarətlər nəticəsində yaranan postravmatik şok nəticəsində ölüblər".
11:14 02.07.2025
Oxunuş sayı: 7358
