NATO-nun "istifadə müddəti başa çatıb": Üçüncü dünya savaşı başlaya bilər
Macarıstanın baş naziri Viktor Orban Ukraynanın NATO-ya daxil olmasının dünya üçün təhlükə yaradacağını bildirib. Onun sözlərinə görə, bu addım III Dünya müharibəsinin başlanmasına səbəb ola bilər. Orban həmçinin münaqişənin sülh yolu ilə həllinin vacib olduğunu vurğulayıb. O, tərəfləri dialoqa çağırıb və gərginliyin artmasının qarşısını almağın zəruriliyini qeyd edib.
Məlum olduğu kimi, Şərqi Avropa savaşın başlanmasının əsas səbəbi rəsmi Kiyevin Alyansa üzvlüklə bağlı iddiaları olmuşdu. O zaman qlobal güclər məhz bu vədlə Ukraynanı döyüş meydanına atmışdılar. Bu gün isə tamam fərqli ritorika ortaya qoyurlar.
Bu ziddiyyət barədə Crossmedia.az-a açıqlama verən politoloq Elçin Xalidbəyli qeyd edib ki, Avropa İttifaqı (Aİ)Macarıstanın Ukraynaya hərbi və siyasi dəstəyə qarşı çıxması yöndəki təşəbbüslərinə veto qoyub:
"Təbii ki, bu, açıqlama müəyyən mənada siyasi manipulyasiya xarakteri daşıyır. Macarıstan, Ukraynaya hərbi dəstəyin əleyhinə olan bir dövlətdir. Eyni zamanda, Ukraynaya siyasi dəstəyin verilməsinə də müqavimət göstərməyə çalışır. Əksər hallarda, Aİ dəstək paketlərinə etiraz eləyir, veto qoyur. Yəni, bu Macarıstanın Ukrayna savaşına yönəlik mövqeyi idi".
Politoloq bildirib ki, Macarıstanın Ukraynanın NATO-ya üzvlüyünün Rusiya ilə qarşıdurmanı dərinləşdirəcəyi və bu məsələnin siyasi manipulyasiya obyekti kimi istifadə olunub:
"Yəni Macarıstan hesab eləyir ki, Avropa dövlətləri Ukrayna ucbatından Rusiya ilə qarşıdurma vəziyyətinə düşməməlidirlər. Qarşıdurma vəziyyətində olmamalıdırlar. Və bu baxımdan da Ukraynanın NATO-ya üzvlüyünün Üçüncü Dünya Müharibəsinə səbəb olacağı ilə bağlı açıqlama da böyük ölçüdə manipulyasiya xarakteri daşıyır".
E. Xalidbəylinin sözlərinə görə, Ukraynanın NATO-ya qoşulması Rusiyanı Alyansla birbaşa müharibəyə sürükləyə bilər, lakin Moskva belə bir savaşa hazır deyil:
"Bu o deməkdir ki, Ukrayna NATO-ya üzv olarsa, Rusiya NATO ilə birbaşa savaşa gedəcək. Halbuki Rusiyanın belə bir potensialı mövcud deyil. NATO belə anlaşılır ki, bundan sonra öz sıralarına hansısa dövləti üzv qəbul eləyərkən ilk növbədə Rusiyanın razılığını almalı olacaq. Bu təşkilatın nüfuzdan düşməsi üçün çox ciddi bir səbəbdir. Rəsmi Budapeştin mövqeyi də bunu göstərir. Ukraynanın quruma üzvlüyünü istəməyən başqa NATO ölkələri də var. Ancaq bu, birbaşa Rusiyanın reaksiyasından çəkingənliklə bağlı deyil. Digər dövlətlərin mövqeyi Ukraynanın problemlərinə şərik çıxmaq istəyinin olmaması ilə bağlıdır".
O, Ukraynanın NATO-ya üzv olmasının III Dünya Müharibəsinə səbəb olub-olmayacağı haqda fikirlərini deyib:
"Amma bu lll Dünya Müharibəsinin məhz Ukraynanın NATO-ya üzvlüyü ilə bağlı başlama ehtimalı o qədər də inandırıcı deyil. Rusiya nə qədər təhdid etmiş olsa belə, NATO-ya hücum eləməyə cəsarət göstərməz. Rusiya Ukraynanın NATO-ya üzvlüyü ehtimalını nəzərə alaraq, təhlükəsizlik strategiyasını dəyişməyə məcbur qaldığnı deyib. Hətta Kremldə bu ssenari belə istisna olunmur ki, Ukrayna nə vaxtsa NATO-ya üzv olacaq. Və bu ehtimallara da Rusiya müəyyən mənada hazırlaşır. Çünki müdafiə sistemini daha fərqli qurmaq məcburiyyətindədir. Ukrayna NATO-ya üzv olarsa, NATO silahları, NATO müasir texnikası Rusiyanın sərhədlərinə daha da yaxınlaşmış olacaq. Bu, Rusiyanı narahat etməlidir. Macarıstan və digər Avropa ölkələri Ukraynanın NATO-ya üzvlüyünü Rusiyaya qarşı kollektiv təhlükəsizliyin güclənməsi kimi dəyərləndirməlidir. Macarıstan və digər Avropa ölkələrini narahat etmək əvəzinə, bundan məmnun olmalıdırlar ki, Ukrayna NATO-ya üzv olmaqla NATO Rusiyanın sərhədlərinə daha da yaxınlaşsın.NATO Rusiyanın reaksiyasına uyğun davranırsa, öz "istifadə müddətini" bitirib deməkdir. Bu baxımdan hesab eləmək olar ki, sözügedən açıqlama lll Dünya Müharibəsi üzərindən bir manipulyasiyadır və NATO-nun nüfuzuna da sarsıcı zərbədir. Çünki, NATO dünyanın ən nüfuzlu hərbi-siyasi alyansıdırsa, onda hansı dövləti öz sıralarına qəbul edib-etməyəcəyi məsələsini Rusiyanın reaksiyasına uyğun müəyyənləşdirməməlidir. Əgər müəyyənləşdirirsə, deməli artıq NATO öz dövrünü bitirib".
Fatimə Nəbiyeva
19:33 29.06.2025
Oxunuş sayı: 1008
