Ermənistanda vəziyyət gərginləşir - Paşinyanla kilsə qarşıdurması dərinləşir
Bu gün Ermənistanın Baş naziri Nikol Paşinyan hökumətin üzvlərinə çevriliş hazırlamaq iddiası ilə müxalifət dairələrinə qarşı əhəmiyyətli hüquq-mühafizə əməliyyatı barədə məlumat verib. Onun sözlərinə görə, cinayətkar, oliqarx və ruhani çevrələrə bağlı qüvvələr Ermənistanın sabitliyini pozmağa və zorakı yolla hakimiyyəti ələ keçirməyə yönəlmiş “genişmiqyaslı və qorxunc plan” hazırlayıblar və Ermənistan bu planının qarşısını alıb. Ermənistan İstintaq Komitəsinin arxiyepiskop Baqrat Qalstanyanın evində apardığı axtarışlar da bu çərçivədə həyata keçirilib.
Paşinyanın çıxışından sonra ölkədə siyasi vəziyyət yenidən gündəmin əsas mövzusuna çevrilib. Müxalif dairələr hökuməti fərqli düşünənləri hədəfə almaqda ittiham edərkən, hökumət tərəfdarları təhlükənin real olduğunu vurğulayır. Hadisə həm Ermənistan daxilində, həm də beynəlxalq mediada geniş rezonans doğurub.
Maraqlı və düşündürücü olan isə budur: kriminal-oliqarx və ruhani dairələrin hakimiyyəti zorakı yolla ələ keçirməyə çalışması Ermənistanda real təhlükədirmi, yoxsa bu, müxalifəti susdurmaq üçün siyasi vasitədir?
Mövzu ilə bağlı politoloq Əli Zülfüqaroğlu Crossmedia.az-a açıqlama verib. Politoloq bildirib ki, kilsə ilə hökumət arasında qarşıdurma yeni məsələ deyil: “Hələ əvvəlki illərdən başlayaraq keşiş Qalstanyanın rəhbərliyi ilə kilsə hökumətə qarşı etiraz dalğasının formalaşdırılmasını açıq formada davam etdirirdi. Qalstanyan çalışırdı ki, Paşinyan hökumətinin devrilməsi istiqamətində müəyyən zəmin hazırlansın, amma bir neçə dəfə bu cəhdlər olsa da, heç bir nəticə əldə olunmadı.
İndiki vəziyyətdə isə biz daha təşkilatlanmış və genişləndirilmiş formada Paşinyan hökumətinə qarşı mübarizə aparıldığını görürük. Burada kilsə ilə yanaşı, erməni lobbisinin revanşistlərlə birlikdə mübarizə apardığının şahidi oluruq. Bundan öncəki dönəmdə isə Ermənistandan Karatepyanın həbsi həyata keçirildi və həmçinin Karatepyan bir sıra açıqlamalar vermişdi – kilsənin lehinə və kilsə ilə birlikdə hökumətə qarşı mübarizə aparılması ilə bağlı. Bu da onu deməyə əsas verir ki, əslində hökumətə qarşı müəyyən təhdidlərin yaranma perspektivləri var və Paşinyanın radikallaşması da buradan qaynaqlanır.
Mümkündür ki, bu prosesin davamında Qalstanyanın da həbsi gözlənilməz deyil və bu prosesin məntiqi nəticəsi olaraq ortaya çıxır.
Digər tərəfdən, kilsə-hökumət qarşıdurmasının köklü səbəbləri var. Bu qarşıdurmanın əsas səbəblərindən biri də Azərbaycan-Ermənistan arasında sülh müqaviləsinin imzalanması və Ermənistan Konstitusiyasının dəyişdirilməsidir. Əgər Konstitusiya dəyişsə, kilsə və lobbinin malik olduğu bir sıra xüsusi imtiyazlar ləğv edilə bilər və həmçinin "Böyük Ermənistan" ideologiyasının üzərindən xətt çəkilə bilər.
Ona görə də kilsə və lobbi maksimum dərəcədə çalışırlar ki, Paşinyan hökuməti devrilsin və bu istiqamətdə müəyyən addımların atıldığının şahidi oluruq.
Ermənistanda vəziyyət kifayət qədər gərgindir. Qarşıdan parlament seçkiləri gəlir və bu seçkilərə qədər kilsə, lobbi və revanşistlərin yaratdığı qeyri-rəsmi ittifaq hökumətə qarşı təbliğatlarını genişləndirəcək.
Hesab edirəm ki, Paşinyan bu detalları nəzərə alaraq öncəlik nümayiş etdirir və baş verənləri bunun bir mənfi nəticəsi olaraq müşahidə edirik”.
Fidan Qarayeva
18:50 25.06.2025
Oxunuş sayı: 1329
