“Bütün piyada keçidləri işıqforla təmin olunsun”- TƏKLİF
Müasir şəhər infrastrukturunda yol hərəkətinin təhlükəsizliyinin təmin olunması prioritet məsələlərdən biridir. Xüsusilə də piyada keçidləri bu baxımdan xüsusi əhəmiyyət daşıyır. Piyadaların və nəqliyyat vasitələrinin təhlükəsiz şəkildə hərəkətini təmin etmək üçün müxtəlif texniki və təşkilati tədbirlər həyata keçirilir. Lakin ictimai müzakirələrdə tez-tez qarşıya çıxan məsələlərdən biri də budur: görəsən, bütün piyada keçidləri mütləq şəkildə işıqforla təmin olunmalıdırmı? Bu sual ətrafında fikir ayrılıqları mövcuddur və məsələni hüquqi-nəzəri baxımdan aydınlaşdırmaq vacibdir.
Bu sualın cavabını Crossmedia.az-a nəqliyyat eksperti Elməddin Muradlı cavablandırıb.
Ekspertin sözlərinə əsasən,bütün piyada keçidləri eyni hüquqi və texniki statusa malik deyil: “Piyada keçidləri iki əsas yerə bölünür: nizamlanan və nizamlanmayan keçidlər. Nizamlanan piyada keçidləri adından da göründüyü kimi, işıqfor və ya digər tənzimləyici texniki vasitələrlə təchiz olunur. Bu tip keçidlərdə hərəkətin axını xüsusi qurğular vasitəsilə nizama salınır və piyadaların keçidi üçün konkret zaman ayrılır. Bundan fərqli olaraq nizamlanmayan piyada keçidlərində hərəkət işıqfor vasitəsilə tənzimlənmir. Bu hallarda qaydalara əsasən, əgər piyada keçidə yaxınlaşır və yolu keçməyə niyyət edirsə, nəqliyyat vasitələri mütləq şəkildə dayanmalı və piyadaya yol verməlidir. Bu, mövcud yol hərəkəti qaydaları ilə açıq şəkildə tənzimlənir və sürücülərin hüquqi məsuliyyətini müəyyən edir”.
O bildirib ki, təhlükəsizlik baxımından bütün piyada keçidlərinin işıqforla təmin olunması daha məqsədəuyğun olardı: “Lakin infrastruktur imkanları və yol hərəkətinin intensivliyi nəzərə alınaraq bu, praktikada hər zaman mümkün olmur. Digər tərəfdən, mövcud işıqforların texniki vəziyyəti də xüsusi önəm daşıyır. Əgər işıqfor nasazdırsa və bu, qəza riskini artırırsa, başqa hüquqi məsələ gündəmə gəlir. Bu, müvafiq qurumlar tərəfindən operativ şəkildə aradan qaldırılmalıdır. Qanunvericilikdə bütün piyada keçidlərinin işıqforla təchiz olunması barədə məcburi tələb yoxdur. Əsas məsələ, hər bir yol iştirakçısının — istər sürücü, istərsə də piyada — mövcud qaydalara ciddi riayət etməsi və qarşılıqlı anlayış prinsiplərinə əsaslanmasıdır. Bu isə nəinki hüquqi məsuliyyətdir, eyni zamanda ictimai təhlükəsizlik və mədəniyyət məsələsidir”.
Ləman Həsənova
20:44 21.06.2025
Oxunuş sayı: 800
