Politoloq: “Tramp Rusiyanın istəklərinə etiraz etmir”
ABŞ Dövlət Departamentinin son açıqlamasına görə, Rusiya və Ukrayna arasında davam edən münaqişə ilə bağlı yekun qərarların verilməsi birbaşa ABŞ Prezidenti Donald Trampın səlahiyyətindədir. Rəsmi Vaşinqton isə hesab edir ki, bu münaqişənin həlli yalnız diplomatik razılaşmalar və danışıqlar yolu ilə mümkündür. Bu yanaşma bir tərəfdən Tramp administrasiyasının məsuliyyətini önə çıxarır, digər tərəfdən isə vacib suallar doğurur: Əgər qərarlar doğrudan da Trampın iradəsindən asılıdırsa, niyə bu vaxta qədər müharibəni dayandırmaq mümkün olmayıb?
Tramp seçki kampaniyasından bəri müharibəni "qısa zamanda bitirəcəyini" dəfələrlə vəd etsə də, real nəticələr hələ ki ortada deyil. Bu isə həm onun vasitəçilik imkanlarının məhdudluğu, həm də Rusiya və Ukrayna arasında yaranmış geosiyasi və təhlükəsizlik dilemmasının mürəkkəbliyi ilə izah olunur. Hazırkı reallıqda münaqişənin yalnız bəyanatlarla deyil, konkret və balanslaşdırılmış diplomatik mexanizmlərlə tənzimlənməsi tələb olunur. Tramp isə, görünən odur ki, bu mexanizmləri ya hələ işə salmayıb, ya da onların təsir dairəsi istənilən nəticəni verməyib.
Mövzu ilə bağlı politoloq Elşad Mirbəşiroğlu Crossmedia.az-a açıqlama verib: “Sözsüz ki, bütün hallarda Rusiya və Ukrayna arasında razılaşma olacaq. Tramp hələ seçkilər dönəmində demişdi ki, o, qısa zaman kəsiyində bu müharibəyə son verəcək. Bu istiqamətdə onun tez bir zamanda addımlar atdığının da şahidi olduq. Yanvarın 20-də rəsmi səlahiyyətlərinin icrasına başladıqdan qısa zaman keçdikdən sonra ABŞ prezidenti ilə Rusiya lideri Vladimir Putin arasında telefon danışığı baş tutdu. Bu telefon danışığı hər şeydən öncə ABŞ ilə münasibətlərin yeni səhifəsini açdı. Bunun ardınca ABŞ rəsmiləri ilə Rusiya rəsmiləri arasında görüş keçirildi və təkcə Ukrayna məsələsi deyil, eyni zamanda ikitərəfli münasibətlər və iqtisadi əlaqələrin qurulmasında da geniş müzakirələr baş tutmuşdu. Sözsüz ki, Tramp bir çox hallarda bu müharibənin həll olunmadığı üçün məyusluğunu ifadə edir”.
Politoloq, həmçinin qeyd edib ki, Tramp tez-tez fikirlərində transformasiya edir: "Bütün hallarda bu prosesi nəzarətində saxlamağa çalışır. Tramp Rusiya-Ukrayna müharibəsini Avropaya uyğun şəkildə həll edə bilməz. Bu istiqamətlərdə cəhdlər etmək olar, amma yalnız hərbi yolla. Tramp başa düşür ki, hərbi yolla da bu məsələnin həllinə yönəlmək mümkün deyil. Avropa istəyir ki, Rusiya münaqişənin başlanğıcındakı vəziyyətə qayıtsın, lakin Rusiya bunu heç vaxt etməyəcək. Tramp administrasiyası da bunu təsdiq edir. Bütün bunlara baxmayaraq, Tramp müharibənin tənzimlənməsi istiqamətində addım atmaqda israrlı görünür. Rusiya münaqişəni mövcud reallıqlar fonunda həll etmək istəyir. ABŞ-də buna qarşı çıxıb, etiraz etmir. Deməli müəyyən mənada uyğunlaşacaqlar”.
Ayhan
15:43 21.06.2025
Oxunuş sayı: 1600
