Özbəkistan Prezidenti Azərbaycan gəlir – Gündəmdə önəmli məsələlər var – Deputat
Özbəkistan Prezidentinin Azərbaycana səfəri iki ölkə arasındakı strateji əməkdaşlığın daha da güclənməsində mühüm rol oynayacaq. Bu səfər, həm iqtisadi, həm siyasi, həm də mədəni sahələrdə əlaqələrin genişləndirilməsi üçün yeni imkanlar açır. Azərbaycan və Özbəkistan arasında ortaq tarix, mədəniyyət və iqtisadi maraqların mövcudluğu, səfərin əhəmiyyətini daha da artırır. Ümumilikdə, bu səfər regional əməkdaşlığın dərinləşməsi və qarşılıqlı faydalı tərəfdaşlığın genişlənməsi istiqamətində mühüm addım kimi qiymətləndirilə bilər.
Mövzu ilə bağlı Deputat Tənzilə Rüstəmxanlı Crossmedia.az-a açıqlama verib. Onun sözlərinə görə, Qarabağ zəfərindən öncə də Azərbaycanla Özbəkistan arasında münasibətlərdə heç bir problem olmayıb. İki ölkə arasında daim dostluq və qarşılıqlı anlaşma mövcud olub.
O bildirib ki, Qarabağ zəfərindən sonra Türk Dövlətləri Təşkilatının fəaliyyəti çərçivəsində Özbəkistan əvvəllər bu məsələyə bir qədər məsafəli yanaşsa da, sonradan daha fəal mövqe tutmağa başlayıb. Onun sözlərinə görə, məhz bu prosesdən sonra Azərbaycanla Özbəkistan arasındakı əlaqələr daha da sıxlaşıb.
Deputat vurğulayıb ki, hazırda Özbəkistan-Azərbaycan münasibətləri, Türkiyə ilə olan əlaqələrlə müqayisədə tam eyni səviyyədə olmasa da, Türk Dövlətləri arasında ikinci yerdədir. “Qarabağ zəfərindən sonra Özbəkistan-Azərbaycan münasibətləri demək olar ki, Türkiyə qədər olmasa da, Türk Dövlətləri içində indi ikinci yerdədir” – deyə o bildirib.
T.Rüstəmxanlının sözlərinə görə, ötən il onun rəhbərlik etdiyi Azərbaycan Türk Qadınlar Birliyi və Azərbaycan-Türkiyə Evi tərəfindən Daşkənddə Qərbi Azərbaycana Qayıdış Konsepsiyası çərçivəsində insan haqları ilə bağlı böyük tədbir təşkil olunub. O qeyd edib ki, həmin tədbirdə Özbəkistanın millət vəkilləri, siyasətçiləri, düşüncə mərkəzləri və qeyri-hökumət təşkilatlarının nümayəndələri iştirak ediblər və Azərbaycanın məsələsinə böyük həssaslıq və səmimiyyətlə yanaşıblar.
Deputatın sözlərinə görə, bu münasibətlər həm dövlətlərarası səviyyədə, həm də liderlər arasındakı şəxsi əlaqələr fonunda formalaşıb və möhkəmlənib. O əlavə edib ki, Azərbaycan Prezidenti İlham Əliyevin Türk dünyasına baxışı bu münasibətlərin inkişafında mühüm rol oynayıb.
“Prezidentimizin ‘bizim başqa bir ailəmiz yoxdur, Türk dünyası bizim ailəmizdir’ deməsi çox önəmli və cəsarətli bir açıqlama idi” – deyə Tənzilə Rüstəmxanlı bildirib.
Deputat əlavə edib ki, Qarabağ zəfəri zamanı Türkiyənin verdiyi siyasi, mənəvi və maddi dəstək Azərbaycan xalqı tərəfindən heç vaxt unudulmayacaq. Bununla yanaşı, Özbəkistan da Zəfərdən sonra Qarabağa xüsusi münasibət göstərib. Onun sözlərinə görə, Özbəkistan tərəfindən Füzuli rayonunda inşa edilən böyük orta məktəb bunun bariz nümunəsidir.
T.Rüstəmxanlı bildirib ki, həmin məktəbi şəxsən ziyarət edib və orada yaradılan şəraitdən çox təsirlənib. “İnanın ki, sadəcə məktəb deyil. Sanki bir universitet, bir elmi tədqiqat institutu orda fəaliyyət göstərir. Çox gözəl, hər vəsaitlə təmin olunmuş bir məktəbdir” – deyə deputat vurğulayıb.
O hesab edir ki, gələcəkdə Azərbaycanla Özbəkistan arasında qarşılıqlı səfərlər daha da intensivləşəcək və münasibətlər yüksələn xətlə inkişaf edəcək. Deputat əlavə edib ki, yaxın vaxtlarda Özbəkistan Prezidentinin Azərbaycana səfəri gözlənilir və bu səfər iki ölkə arasında həm siyasi, həm də iqtisadi əməkdaşlığa yeni töhfələr verəcək.
Sonda Tənzilə Rüstəmxanlı qeyd edib ki, Azərbaycan və Özbəkistan biri-birinin apardığı xarici siyasətdə hər zaman eyni mövqedən çıxış edən, fikir ayrılığı yaşamayan iki qardaş dövlətdir.
Fatimə Nəbiyeva
16:00 20.06.2025
Oxunuş sayı: 966
