Qlobal təhlükəsizliyə təhdid: “Çin İranı silahlandıra bilər”
İranın xarici işlər naziri Abbas Ərağçi Avropanın üç ölkəsindən olan həmkarları ilə iyunun 20-də Cenevrədə danışıqlar aparacağını təsdiqləyib.
Bu barədə IRNA agentliyi məlumat yayıb. “Biz cümə günü Cenevrədə Avropa nümayəndə heyəti ilə görüşəcəyik”, - deyə iranlı nazir bildirib.
Onun sözlərinə görə, danışıqlar Almaniya, Fransa və Böyük Britaniyanın xarici işlər nazirləri İohan Vadeful, Jan-Noel Barro və Devid Lamminin iştirakı ilə keçiriləcək. Ərağçi qeyd edib ki, danışıqlarda Avropa Komissiyasının nümayəndəsi Kaya Kallas da iştirak edəcək.
Bundan əvvəl “Reuters” agentliyi belə bir görüş barədə məlumat vermiş və danışıqların nüvə məsələsinə aid olacağını bildirmişdi.
Gözlənilən görüş barədə Crossmedia.az-a danışan politoloq Məhəmməd Əsədullazadə bildirib ki, Qərbin əsas narahatlığı nüvə məsələsindən çox, İranda rejimin dəyişdirilməsi ilə bağlıdır: “Yaxın Şərqdə yeni siyasi nizamın qurulması prosesi gedir. İsrail isə İranın hazırkı rejimini devirmək məqsədini artıq gizlətmir. Hətta ali dini lidür Ayətulla Xameneinin öldürülməsi də konkret şəkildə müzakirəyə çıxarılır”.
Onun fikrincə, Böyük Britaniya, Fransa və Almaniya bu proseslərdə vasitəçi rolunu oynamağa hazırdır. Onların prezident Donald Trampa təzyiq etməsi nəticəsində Vaşinqton da danışıqlara qoşula bilər: “Əgər Cenevrədə danışıqlar baş tutarsa, bu, Avropada müvəqqəti atəşkəsin əldə olunmasına yol aça bilər. Çin isə bölgədəki müharibənin genişlənməsində maraqlı deyil. Əgər ABŞ hərbi müdaxiləyə əl atsa, Çin İranı silahlandıra və bu da qlobal təhlükəsizlik üçün böyük təhdidə çevrilə bilər. Danışıqlar masasına oturmaq bölgədə sabitliyə doğru atılan mühüm addım ola bilər”.
Zəhra Ağayeva
20:37 19.06.2025
Oxunuş sayı: 31405
