Tramp Putinlə münasibətləri korlamaq istəmir - POLİTOLOQ
ABŞ prezidenti Donald Trampın G7 sammiti zamanı Kanadadan qəfil geri dönməsi beynəlxalq mediada və siyasi dairələrdə ciddi rezonansa səbəb olub. Hadisənin səbəbi ilə bağlı rəsmi açıqlamanın verilməməsi müxtəlif ehtimalların və şayiələrin yaranmasına yol açıb. Fransa Prezidenti Emmanuel Makronun Trampın bu qərarı barədə heç bir məlumata sahib olmadığını bildirməsi isə vəziyyətə əlavə qeyri-müəyyənlik qatıb. Tramp isə “Truth Social” platformasında yayımladığı qısa açıqlamada səfərini dayandırmasının İsrail-İran arasında gərginləşən münasibətlərlə və mümkün atəşkəslə bağlı olmadığını vurğulayaraq, bu qərarın "daha ciddi səbəblərlə" əlaqəli olduğunu qeyd edib.
Bu isə ictimaiyyət və ekspertlər arasında sual doğurur: Hazırda ABŞ üçün Yaxın Şərqdəki müharibədən daha vacib nə ola bilər?
Mövzu ilə bağlı politoloq Aydın Quliyev Crossmedia.az saytına açıqlama verib:
“Bu gün ABŞ və İsrail arasında gizli bir İran sövdələşməsinin olduğu istisna deyil. Bu sövdələşmənin mahiyyətinin nədən ibarət olduğunu isə tam dəqiqliyi ilə görmək bizim üçün mümkünsüzdür. Amma şübhəsiz ki, ABŞ və İsrailin gizli İran müzakirəsi həm ABŞ-nin həm də İsrailin strateji maraqlarına uyğundur. Çünki İran əleyhinə aparılan müharibədə İsrailin və ABŞ-nin eyni müstəvidə hərəkət etdikləri aydın şəkildə görünür. Bu şəraitdə Trampın G7 zirvəsini vaxtından əvvəl tərk etməsinin səbəbləri üzərində ancaq versiya yürüdə bilərik. Tramp G7 lərin qəbul edə biləcəyi hansısa bir qərarın iştirakçısı olmaya da bilər, xüsusilə G7 zirvəsində Rusiya neftinə 45% lik maksimum qiymət qoyulması ilə bağlı bir sənəd var idi. Trampın bu sənədə imza atan liderlərdən olmaması da mümkündür. Çünki Tramp hazırda Putinlə münasibətləri kəskinləşdirməyə imkan verməmək ovqatına köklənib. Trampın bu zirvəni vaxtsız tərk etməsi həm də Fransanın müəyyən planlarına cavab ola bilər. Hazırda yeni dünya nizamının formalaşması prosesi gedir. Ola bilər ki, yeni dünya nizamında ABŞ və İsrail ayrıca bir geosiyasi mərkəzə çevrilsin. Görünür Makron və digər Avropa liderləri də bu perspektivi istisna etmirlər. Ona görə də indidən gələcəyin siyasi konfiquriyasiyasına hazırlaşırlar”.
Ayhan Ağarzayev
12:40 18.06.2025
Oxunuş sayı: 12237
