Daşıma xidmətlərində istehlakçı problemləri gündəmə gətirildi
Prezident yanında Antiinhisar və İstehlak Bazarına Nəzarət Dövlət Agentliyində daşıma xidmətləri sahəsində istehlakçı hüquqlarının cari vəziyyəti və mövcud problemlərin müzakirəsi məqsədilə bu istiqamətdə fəaliyyət göstərən sahibkarlıq subyektləri ilə növbəti maarifləndirici görüş keçirilib.
Crossmedia.az agentliyə istinadən xəbər verir ki, görüş zamanı sahibkarlara istehlakçılardan daxil olmuş müraciətlər, ən çox şikayət olunan sahələr üzrə aparılan təhlillər və araşdırmalar barədə ətraflı məlumat verilib. Sözügedən sahədə mövcud problemlərin aradan qaldırılmasının ən effektiv yolu kimi dövlət-özəl sektor tərəfdaşlığı çərçivəsində sahibkarlarla qarşılıqlı əməkdaşlığa üstünlük verildiyi vurğulanıb.
Tədbir zamanı istehlakçılara təqdim olunan xidmətlərin, xüsusilə də daşıma tariflərinin qiymətlərinin manatla göstərilməsi, daşıma haqlarının hesablanması qaydası barədə istehlakçılara dəqiq və düzgün məlumatların verilməsi, təhvil məntəqələrində bağlamaların ölçü və çəkisinin müəyyən edilməsi məqsədilə standartlara uyğun nəzarət-ölçmə vasitələrinin yerləşdirilməsi, istehlakçıların hüquqlarını məhdudlaşdıran şərtlərin müqavilələrə daxil edilməsinin yolverilməzliyi, eyni zamanda istifadə olunan ölçmə vasitələrinin dövri yoxlamadan keçirilməsinin zəruriliyi sahibkarların diqqətinə çatdırılıb.
Görüş çərçivəsində daşıma xidmətləri sahəsində mövcud olan çatışmazlıqlar, istehlakçıların üzləşdiyi əsas problemlər və onların həlli yolları ətrafında qarşılıqlı fikir mübadiləsi aparılıb, sahibkarların sualları cavablandırılıb və praktiki məsələlərə dair tövsiyələr verilib.
17:23 13.06.2025
Oxunuş sayı: 821
