“Rusiya artıq mövqeyini itirib və yerini Çin tutub”
Rusiya Federasiyasının Odessa və ətraf bölgələrə yönəlik strateji planları təkcə Ukraynanın ərazi bütövlüyünə deyil, həm də Cənub-Şərqi Avropada geosiyasi balansın pozulmasına xidmət edir. Prezident Volodimir Zelenski açıqlamasında qeyd edib ki, Kreml bu bölgəni ələ keçirməklə Moldova və Rumıniya ilə sərhədə qədər irəliləməyi qarşısına məqsəd qoyub. Rusiya tərəfindən Odessa və Nikolayevin ələ keçirilməsi cəhdləri, Ukraynanın Qara dənizlə strateji əlaqəsinin qoparılması niyyəti ilə bağlıdır. Bu isə təkcə Ukraynanın iqtisadi və nəqliyyat kommunikasiyalarına deyil, eyni zamanda Qara dəniz hövzəsindəki enerji, ticarət və təhlükəsizlik maraqlarına zərbə vurur.
Mövzu ilə bağlı hərbi ekspert İbrahim Rüstəmli Crossmedia.az-a açıqlama verib:
“Rusiya-Ukrayna müharibəsi başlayandan bəri ABŞ başda olmaqla bir sıra Qərb dövlətləri Rusiyanın əsas məqsədi haqqında bəyanatlar verməyə başladılar. ABŞ Ukraynaya dəstək baxımından müharibənin əvvəlindən lider dövlətdir. Rusiya-Ukrayna müharibəsi düşünülmüş, zərgər dəqiqliyi ilə hesablanmış bir ssenaridir. Heç bir insan özünə konkret rəqib istəmədiyi kimi heç bir dövlət də özünə rəqib istəmir. Müəyyən müddət dünyada sadəcə iki super güc var idi: ABŞ və Rusiya. Lakin Rusiya artıq o mövqeni itirib və yerini Çin tutub. Rusiyanın tarix boyu yürütdüyü tək siyasət istiladır və onun siyasətinin rüşeymində işğal dayanır. Rusiya itirdiyi super gücünü bərpa etmək üçün əvvəlcə keçmiş SSRİ dövlətlərini ələ almaq üçün çalışacaq və buna Ukrayna ilə başlayıb.Daha sonra isə Avropa dövlətlərini hədəfə alacaq. Rusiya real bir təhlükədir və bu təhlükə bizim üçün də var”.
Ayhan Ağarzayev
17:07 12.06.2025
Oxunuş sayı: 910
