Politoloq: “Rusiya nə atəşkəsdə, nə də sülhdə maraqlıdır”
Rusiya-Ukrayna müharibəsi iki ilə yaxındır davam edir və tərəflər arasında hərbi əməliyyatlar intensiv olaraq sürməkdədir. Bu müddət ərzində bir neçə dəfə atəşkəs və sülh danışıqları gündəmə gəlsə də, nəticəsiz qalıb. Moskvanın sülhə yanaşması və diplomatik proseslərdəki mövqeyi isə beynəlxalq ictimaiyyətin diqqət mərkəzindədir. Kreml sözçüsü Dmitri Peskovun “Rusiya və Ukrayna danışıqları davam etdirməlidir” açıqlaması da bu kontekstdə yeni müzakirələrə səbəb olub.
Məsələ ilə bağlı politoloq Məhəmməd Əsədullazadənin Crossmedia.az-a verdiyi şərh isə rəsmi Moskvanın mövqeyinin əslində hansı niyyəti daşıdığını ortaya qoyur: "Rusiya nə atəşkəsə, nə də real sülh danışıqlarına maraq göstərir. Rusiya əvvəlki – xüsusilə də İstanbul danışıqları zamanı sülh görüntüsü yaratmağa çalışsa da, əslində bu prosesi manipulyasiya edib.
Rusiya sadəcə danışıq görüntüsü verir. İstanbul danışıqlarında guya sülh planı təklif etmişdilər, amma əslində Ukraynaya kapitulyasiya sənədi təqdim olunmuşdu. Təbii ki, Ukrayna bunu qəbul edə bilməzdi".
Müsahibimiz düşünür ki, ABŞ-nin hazırkı administrasiyası da bu prosesdən müəyyən qədər çəkilib və Prezident Donald Trampın da Rusiya-Ukrayna müharibəsinə müdaxilə etmək niyyətində olmadığı aydın görünür: “Trampın rusiyalı həmkarı Vladimir Putinlə telefon danışıqları göstərdi ki, rəsmi Vaşinqton Rusiyanın Ukraynaya qarşı hərbi əməliyyatlarına demək olar ki, qarışmayacaq. Bu, bir növ Ukraynanın işğalına yaşıl işıq yandırmaq deməkdir”.
Politoloq Avropa ölkələrinin Ukraynaya verdiyi hərbi dəstəyin vacibliyini də vurğulayıb:
“Hazırda bu münaqişənin diplomatik yolla həllinin mümkün olmadığı görünür. Ukraynaya daha ciddi hərbi dəstək lazımdır ki, Rusiya irəliləyişini dayandırsın və onu real danışıqlara cəlb edə bilsin.”
Zəhra Ağayeva
12:01 10.06.2025
Oxunuş sayı: 11221
