Politoloq: "Trampın çıxışı Qərbdə fikir ayrılığını üzə çıxardı"
ABŞ Prezidenti Donald Tramp və Rusiya lideri Vladimir Putin arasında uzunmüddətli telefon danışığı baş tutub. Danışıqlarda Ukraynanın Rusiya aerodromlarına hücumları və İranın nüvə proqramı müzakirə olunub. Tramp bildirib ki, Putin aerodromlara edilən hücumlara cavab verməyə hazırdır. Həmçinin, liderlər İranın nüvə silahı məsələsində vaxtın daraldığını vurğulayıblar.
Sözügedən telefon danışığı barədə Crossmedia.az-la fikirlərini bölüşən türkiyəli politoloq Deniz Berktay bildirib ki, Trampın son açıqlamaları Qərb daxilində Ukrayna müharibəsi ilə bağlı parçalanmanı açıq şəkildə göstərir: "Hazırda ABŞ-də Demokratlar, Avropada isə Böyük Britaniya başda olmaqla bəzi qüvvələr Rusiyaya qarşı sərt siyasətin davam etdirilməsini müdafiə edir.
Lakin Tramp bu münaqişənin daha da şiddətlənmədən sona çatmasını istəyir və bu istiqamətdə fərqli yanaşma təklif edir. Tramp administrasiyası Ukraynanın NATO-ya üzv olmasının real olmadığını düşünür və Rusiyanın bu məsələ ilə bağlı narahatlığını nəzərə almağın zəruri olduğunu bildirir. Tramp rəhbərliyi Ukraynanın NATO-ya daxil olmasının real olmadığını düşünür və bu məsələ ilə bağlı Rusiya ilə danışıqlara başlamağa hazırdır.
D.Berktay qeyd edib ki, ABŞ-dəkı Demokratlar və Avropada Britaniyanın da daxil olduğu bəzi dairələr NATO-nun genişlənməsini davam etdirməkdə israrlıdırlar: "Onlar Ukraynanın üzvlük prosesinin davam etməsini zəruri sayırlar. NATO-nun genişlənməsi bu müharibəni doğuran əsas səbəblərdən biridir. Bu baxımdan Trampın çıxışı Qərb daxilindəki parçalanmanı çox aydın şəkildə göstərir”.
Ekspert hesab edir ki, bu şərtlər altında müharibənin yaxın gələcəkdə sona çatması bir tərəfdən Rusiyanın daha yumşaq mövqe tutmasından, digər tərəfdən isə Qərb dünyasında Trampın mövqeyinin təsir gücündən asılı olacaq: "Müharibənin taleyi həm də Trampın Britaniya kimi ölkələri inandıra bilməsi və ya əksinə, onların Trampı öz mövqelərinə cəlb edib-etməməsindən asılıdır".
Fatimə Nəbiyeva
15:57 05.06.2025
Oxunuş sayı: 11652
