"COP29 iqlim diplomatiyasının dönüş nöqtəsi oldu" - Deputat
Azərbaycan və Braziliya iqlim dəyişikliyi ilə mübarizə məqsədilə 1,3 trilyon dollarlıq proqram hazırlayır. Bu barədə Prezidentin iqlim məsələləri üzrə nümayəndəsi, COP29-un Prezidenti Muxtar Babayev 30-cu Yubiley Bakı Enerji Forumu çərçivəsində məlumat verib. O bildirib ki, bəzi ölkələrin, xüsusilə ABŞ-ın iqlim müzakirələrindən geri çəkilməsi prosesi çətinləşdirib. Bununla belə, digər donor ölkələr Bakıda verdikləri vədlərə uyğun hazırlıqlara başlayıblar. Babayev qeyd edib ki, COP29 zamanı 300 milyard dollarlıq vəsaitin toplanması razılaşdırılıb və bu, tarixi nəticə kimi qiymətləndirilir.
Mövzu ilə bağlı Deputat Pərvanə Vəliyeva Crossmedia.az-a olan açıqlamasında bildirib ki, COP29 zamanı Azərbaycan “iqlim diplomatiyası” sahəsində dönüş nöqtəsinə çevrildi.
P.Vəliyevanın sözlərinə görə, inkişaf etmiş ölkələrin inkişaf etməkdə olan ölkələrə iqlim fəaliyyəti üçün 2035-ci ilədək hər il ən azı 300 milyard ABŞ dolları məbləğində yardım ayırması nəzərdə tutulur. Bu vəsaitin həcmi sonrakı mərhələdə ildə 1,3 trilyon dollara qədər artırıla bilər.
“Bakı intensiv, çoxtərəfli diplomatiya ilə gözləniləndən daha artığına nail oldu” – deyə deputat vurğulayıb.
Pərvanə Vəliyeva bildirib ki, Yeni İqlim Maliyyə Məqsədinin qəbulu iqlim dəyişikliyinə qarşı qlobal mübarizədə transformativ bir addımdır. Onun sözlərinə görə, bu iddialı hədəf dünyanın iqlim böhranını həll etmək üçün resursların hansı mexanizmlərlə səfərbər olunacağını müəyyənləşdirir və çevik, eyni zamanda geniş təsirlərə malikdir.
Deputat qeyd edib ki, artan maliyyə axınları 2030-cu ilə qədər bərpa olunan enerji, dayanıqlı kənd təsərrüfatı və iqlimə davamlı infrastrukturun geniş şəkildə tətbiqinə təkan verəcək.
“Bu maliyyə hədəfi, həmçinin, qlobal maliyyə sistemlərini yenidən formalaşdırmaq, iqlim mülahizələrini iqtisadi strategiyalara daxil etmək və özəl sektor tərəfdaşlıqları vasitəsilə innovasiyaları təşviq etmək potensialına malikdir” – deyə P.Vəliyeva bildirib.
Deputat əlavə edib ki, Azərbaycanın COP29 sədrliyi davam edir və Troyka formatında – yəni Birləşmiş Ərəb Əmirlikləri, Azərbaycan və Braziliya arasında – yeni maliyyə proqramı üzərində işlər aparılır. Bu əməkdaşlıq çərçivəsində beynəlxalq səviyyədə maliyyə dəstəyinin gücləndirilməsi və daha çevik mexanizmlərin formalaşdırılması nəzərdə tutulur.
Fatimə Nəbiyeva
20:35 04.06.2025
Oxunuş sayı: 4736
