Trans-Xəzər yük axını sürətlənir – ADY konteyner daşımalarını rekord həddə çatdırdı
“AZCON Holding”in şirkətlərindən olan “Azərbaycan Dəmir Yolları” QSC-nin (ADY) Trans-Xəzər Beynəlxalq Nəqliyyat Marşrutunun (Orta Dəhliz kimi tanınan) inkişafı üzrə gördüyü işlərin və gələcək planların Münxendə təqdimatı olub.
Crossmedia.az ADY-ə istinadən verdiyi məlumata görə, bu, səhmdar cəmiyyətin sədrinin müşaviri Emil Məmmədovun Almaniyanın Münhen şəhərində keçirilən “Transport Logistic 2025” sərgisi çərçivəsində “İntermodal daşımaların yenidən dəyərləndirilməsi: Trans-Xəzər marşrutu üzrə maneəsiz hərəkət və özəl sektorun rolu” mövzusunda panel müzakirələrində iştirak zamanı baş tutub.
Qeyd olunub ki, ADY tərəfindən beynəlxalq tərəfdaşlarla aparılan davamlı və aktiv danışıqlar nəticəsində Orta Dəhlizlə konteyner daşımalarının həcmi və payı ildən-ilə artır. ADY 2025-ci ilin 4 ayında ötən ilin müvafiq dövrünün göstəricisinə nisbətən konteyner daşımalarını 56 % artırıb.
Özbəkistan və Qazaxıstan dəmiryol administrasiyalarının, Türkiyə Prezidentinin Maliyyə İdarəsinin və Almaniyanın “Rhenus Group” şirkətinin yüksək səviyyəli nümayəndələrinin iştirak etdiyi paneldə Orta Dəhliz boyunca darboğazların aradan qaldırılması, multimodal inteqrasiyanın gücləndirilməsi və daşımaların həcminin artırılması ilə bağlı mövcud baxışlar dəyərləndirilib.
Paneldə xüsusi diqqət dövlət və özəl əməkdaşlığına və transsərhəd ticarət axınında praktik təkmilləşdirmələrə yönəldilib.
19:34 04.06.2025
Oxunuş sayı: 1496
