"Ümumdünya Qida Təhlükəsizliyi Günü Konfransı - Elm fəaliyyətdədir" adlı konfrans keçirilib - YENİLƏNİB
Ümumdünya Qida Təhlükəsizliyi Günü ilə əlaqədar Bakıda "Elm fəaliyyətdədir" şüarı altında beynəlxalq konfrans keçirilib.
Crossmedia.az xəbər verir ki, konfransın rəsmi açılış mərasimində AQTA-nın sədr müavini Zəkiyyə Mustafayeva qeyd edib ki, təhlükəsiz qida həyatın davamlılığı və insan sağlamlığının qorunması üçün əsas şərtlərdən biridir.
BMT-nin Ərzaq və Kənd Təsərrüfatı Təşkilatının (FAO) Azərbaycandakı nümayəndəsi Nasar Hayat güclü, inklüziv və dayanıqlı qida təhlükəsizliyi sistemlərinin qurulmasına sadiq olduqlarını bildirib:
“Bu sahədə sahib olduğumuz ən güclü alətlərdən biri, FAO və Ümumdünya Səhiyyə Təşkilatının (ÜST) birgə təşəbbüsü olan Kodeks Alimentarius Komissiyasıdır. AQTA, Kənd Təsərrüfatı Nazirliyi, Azərbaycan Qida Təhlükəsizliyi İnstitutu və ADA Universiteti müasir, riskləri nəzərə alan və beynəlxalq inteqrasiya olunmuş bir qida təhlükəsizliyi sisteminin qurulmasında əsl liderlik nümayiş etdiriblər”.
ADA Universitetinin prorektoru Elkin Nurməmmədov Kənd Təsərrüfatı və Qida Elmləri fakültəsinin yeni yaradılmış akademik proqramları haqqında danışıb. Onun sözlərinə görə, tezliklə Heyvan Elmləri üzrə bakalavr proqramı təqdim olunacaq.
Kodeks Alimentarius Komissiyasının sədr müavini Betül Vazgeçer isə iştirakçılara videomüraciətində Azərbaycanın kodeks fəaliyyətlərində rolunu yüksək qiymətləndirib.
Daha sonra tədbirdə “Qida sistemlərinin rolu: insan, heyvan və ətraf mühit sağlamlığının inteqrasiyası” və “Qida təhlükəsizliyi və keyfiyyətinin təmin olunmasında ali təhsil sisteminin rolu: gələcək nəsil mütəxəssislər və innovativ elmi yanaşmalar” mövzusunda panel müzakirələr təşkil olunub.
Qeyd edək ki, konfrans çərçivəsində uşaqların sağlam qidalanması ilə bağlı rəsm əsərlərindən ibarət sərgi də nümayiş etdirilib.
09:47
İyunun 4-də ADA Universitetində "Ümumdünya Qida Təhlükəsizliyi Günü Konfransı - elm fəaliyyətdədir" adlı konfrans keçirilir.
Crossmedia.az xəbər verir ki, hər il iyunun 7-də qeyd olunan Ümumdünya Qida Təhlükəsizliyi Günü qida mənşəli risklərin qarşısının alınması, aşkarlanması və idarə olunması ilə bağlı maarifləndirməni təşviq etmək və tədbirlər görmək üçün beynəlxalq platforma rolunu oynayır. İyunun 4-də Azərbaycanda qeyd olunan bu gün Azərbaycan Respublikasının Qida Təhlükəsizliyi Agentliyi (AQTA), BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə Ofisi və ADA Universitetinin birgə təşkilatçılığı ilə həyata keçirilir və “Elm fəaliyyətdədir” ideyasını ehtiva etdirir.
Bu ilin mövzusu qida təhlükəsizliyi sistemlərinin gücləndirilməsində elmə əsaslanan siyasətin, təhsilin və beynəlxalq əməkdaşlığın əhəmiyyətini vurğulamaq, həmçinin laborator tədqiqatlardan innovativ texnologiyalara qədər elmi inkişafın dayanıqlı qida təhlükəsizliyi sistemlərinin qurulmasına necə töhfə verdiyini önə çıxarmaqdır.
Konfransda insan, heyvan, bitki və ətraf mühit sağlamlığının bir-biri ilə əlaqəsini əks etdirən "Vahid sağlamlıq" yanaşması çərçivəsində beynəlxalq təşkilatlar, dövlət qurumları, elm və təhsil ocaqları, habelə, beynəlxalq mütəxəssislər iştirak edir.
13:15 04.06.2025
Oxunuş sayı: 11761
