COP29 rəhbərliyi Qvineya-Bisaunun ətraf mühit naziri ilə görüşüb
Bakı Enerji Həftəsi çərçivəsində COP29-un rəhbəri və Azərbaycan Prezidentinin İqlim məsələləri üzrə nümayəndəsi Muxtar Babayev Qvineya-Bisau Respublikasının ətraf mühit, biomüxtəliflik və iqlim fəaliyyəti naziri Viriatu Luiş Soareş Kassama ilə ikitərəfli görüş keçirib.
Crossmedia.az xəbər verir ki, görüş zamanı COP29-un uğurlu nəticələri, xüsusilə iqlim maliyyəsi ilə bağlı əldə olunmuş mühüm qərarlar və COP30-a gedən yolda davamlılığı və iddialılığı təmin etməyə yönəlmiş “Bakıdan Beləma Yol Xəritəsi”nin təqdimatı müzakirə olunub.
Tərəflər inkişaf etməkdə olan ölkələr arasında əməkdaşlığın gücləndirilməsi və iqlim dəyişikliyindən ən çox zərər görən kiçik ada dövlətləri və ən az inkişaf etmiş ölkələrə dəstəyin artırılmasının vacibliyini vurğulayıblar. Eyni zamanda, təbiətə əsaslanan həllərin təşviqi, biomüxtəlifliyin qorunması və iqlim davamlılığı ilə dayanıqlı inkişaf üçün inteqrasiya olunmuş yanaşmalar ətrafında fikir mübadiləsi aparılıb.
Nazir S.Kassama Azərbaycanı COP29-a ev sahibliyinə görə təqdir edib və Qvineya-Bisaunun qlobal iqlim gündəliyini dəstəkləməyə sadiqliyini bir daha təsdiqləyib. O, həmçinin Azərbaycanın iqlim prioritetlərinin enerji keçidi və dayanıqlı urbanizasiya ilə uzlaşdırılması təşəbbüsünü yüksək qiymətləndirib.
Görüş qarşılıqlı əməkdaşlığın COP30 və sonrakı dövrlərdə də davam etdirilməsi ilə bağlı ortaq öhdəliklə yekunlaşıb.
09:06 04.06.2025
Oxunuş sayı: 10771
