"Azərbaycanda nüvə enerjisindən istifadə aktual məsələyə çevrilib"
Azərbaycanda nüvə enerjisindən istifadə aktual məsələyə çevrilib.
Crossmedia.az xəbər verir ki, bunu Fövqəladə Hallar Nazirliyinin Nüvə və Radioloji Fəaliyyətin Tənzimlənməsi üzrə Dövlət Agentliyinin Nüvə və radiasiya təhlükəsizliyinin ekspertizası şöbəsinin müdiri Mətanət Qəhrəmanova Bakıda keçirilən 22-ci Xəzər Beynəlxalq Nəqliyyat, Tranzit və Logistika Sərgisi çərçivəsində təşkil olunan “Karbon emissiyasının azaldılması istiqamətində alternativ enerji kimi nüvə enerjisinin rolu” panel müzakirəsində deyib.
O bildirib ki, hazırda Azərbaycanda həyata keçirilən bütün fəaliyyətlər radioloji texnologiyalarla əlaqəlidir: "Lakin ölkənin sürətli inkişafı fonunda nüvə texnologiyalarından və nüvə enerjisindən istifadə məsələsi getdikcə daha da aktuallaşır. Bu sahədə beynəlxalq səviyyədə tövsiyələr verən əsas qurumlardan biri Atom Enerjisi üzrə Beynəlxalq Agentlikdir (AEBA). Azərbaycan da bu qurumun üzvüdür və AEBA üzv dövlətlərə texniki yardımlar göstərir, həm milli, həm də regional layihələr həyata keçirir. Bununla yanaşı, üzv ölkələri yeni texnologiyaların tətbiqi və inkişafına çağırır”.
M. Qəhrəmanova bildirib ki, AEBA-nın nüvə texnologiyalarının karbon emissiyasının azaldılmasında tətbiqinə dair ən mühüm təşəbbüslərindən biri “Atom for Net Zero” platformasıdır: “Bu təşəbbüs karbon emissiyasını sıfıra endirmək məqsədi daşıyır və üzv ölkələri nüvə enerjisindən istifadə etməklə bu məqsədə çatmağa səsləyir. Yalnız elektrik enerjisində deyil, həmçinin nəqliyyat və sənaye sahələrində də nüvə texnologiyalarının tətbiqi ilə bu nəticəyə nail olmaq mümkündür”.
Şöbə müdiri əlavə edib ki, məhz bu təşəbbüs COP29 çərçivəsində AEBA-nın əsas panel mövzularından biri olub və Azərbaycan da bu istiqamətdə təşviqat kampaniyasına başlayıb.
O həmçinin vurğulayıb ki, hazırda dünya üzrə elektrik enerjisinin təxminən 10 %-i nüvə enerjisi hesabına əldə olunur və bu göstəricini artırmaq mümkündür: “Lakin bu istiqamətdə addımların atılması müəyyən mərhələlərdən keçməyi tələb edir. İlk mərhələ ölkənin siyasi qərar qəbul etməsidir. Bu qərar milli və regional enerji ssenarilərinin modelləşdirilməsinə əsaslanmalıdır. Ölkə nüvə enerjisindən istifadə strategiyasını formalaşdırmalı, bu enerjiyə hansı sahələrdə ehtiyac olduğunu müəyyənləşdirməlidir. Məsələn, bu elektrik enerjisinin təmininə yönələcək, yoxsa gələcəkdə tətbiqi mümkün olan kiçik modul reaktorlarla bağlı olacaq – bu kimi suallara cavab tapmaq lazımdır”.
18:05 03.06.2025
Oxunuş sayı: 1126
