Qurban təslimiyyətin ifadəsidir - AÇIQLAMA
Qurban bayramı müsəlman dünyasında böyük mənəvi əhəmiyyətə malik olan dini bayramlardan biridir. Hər il Hicri təqvimi ilə Zilhiccə ayının 10-cu günündən başlayaraq qeyd olunan bu bayram, İslamın əsas prinsiplərindən biri olan yardımsevərlik və paylaşma ruhunu özündə ehtiva edir. Bayramın əsasında Hz. İbrahimin itaətkarlıq sınağı dayanır—Allahın əmrinə sadiq qalaraq oğlunu qurban verməyə hazır olduğu an, ilahi mərhəmətlə qarşılaşır və ona bir qoç göndərilir. Bu hadisə müsəlmanlar üçün inancın, fədakarlığın və Allahın sonsuz rəhmətinin təcəssümüdür. Qeyd edək ki, bu il, qurban bayramı miladi təqvimlə iyunun 6 və 7-də qeyd ediləcək.
Mövzu ilə bağlı Crossmedia.az-a açıqlama verən ilahiyyatçı Ağa Hacıbəyli ilk olaraq bildirib ki, qurban kəsmənin əsas mahiyyəti Qurani-Kərimdə Həcc surəsinin 37-ci ayəsində ifadə olunur: “Kəsdiyiniz qurbanların nə əti, nə də qanı Allaha çatmaz, Allaha çatan yalnız insanın içindəki təqvadır (ixlas, — yəni səmimiyyət Allaha olan təslimiyyətdir):
“Qurbanın kəlmə mənası "yaradana yaxınlaşmaq" deməkdir. Yaradana yaxınlaşmaq sadəcə rahatlıq deyil, bu, ibadətlə yanaşı, insanın dünyadan, nəfsdən, şeytandan və İblisdən uzaqlaşmasını, Allahın istədiyi dəyərlərə yönəlməsini ifadə edir. Qurbanlıq heyvan seçərkən ən sağlam və ən gözəl olanı seçmək vacibdir. Xüsusilə, buynuzu qırıq, qulağı kəsik və ya şikəst heyvanlardan qaçınılmalıdır. Çünki qurban Allah rizası üçün təqdim edilən ibadətdir və mümkün olan ən yaxşısı olmalıdır. Heyvanın yaş məhdudiyyəti də nəzərə alınmalıdır. Qoyunlarda 1 yaş, danada isə 2 yaş olmalıdır. Keçi qurbanlıq kəsiləcəksə, onun 1 və ya 1,5 yaş yarım olması tövsiyə edilir.
A. Hacıbəyli bildirib ki, qurban bayram günü namazdan sonra, üzü qibləyə yönəldilərək kəsilir:
“Kəsim zamanı "Bismillah” “Allahu Əkbər" deyilir və heyvanın qanının tam axmasına diqqət yetirilir. Qurban kəsilərkən təmizliyə riayət etmək şərti ilə üç əsas istiqamətə bölünür: bir hissəsi ev əhlinə, ikinci hissəsi qonşulara, üçüncü hissəsi isə yoxsul, kimsəsiz, miskin və fəqir müsəlmanlara paylanır. Qurban belə möhtəşəm bir ibadətin adıdır, təslimiyyətin ifadəsidir. Allahu Təala bu qurban vasitəsilə insanları sınağa çəkir, nəfsin nəfəsini cilovlamağı, dünya malından vaz keçməyi, Allah rizası üçün malından və pulundan keçməyi öyrədir. Arzumuz və niyyətimiz budur ki, növbəti qurbanlarımızı Zəngəzur yolunda, Qərbi Azərbaycana dönüşümüz zamanı kəsək. Allah kəsilən qurbanlarımızı qəbul etsin!”
Nəzrin Salmanova
16:21 02.06.2025
Oxunuş sayı: 10840
