“Trampın məktubları yalnız bir təbrik deyil, həm də siyasi mesajlardır” - DEPUTAT
ABŞ dövlət katibinin müavininin köməkçisi Coşua Hakı və Dövlət Departamentinin Avropa üzrə baş müşaviri Uayett Toelkenin Azərbaycana səfərləri iki dövlət arasındakı münasibətləri inkişaf etdirmək baxımından önəmli addım idi. Onlar Azərbaycana ABŞ-nin maraqlarını, iqtisadi rifahı və regional təhlükəsizliyi təşviq edən ikitərəfli dialoqu davam etdirmək və müəyyən razılaşmalar məqsədilə gəlmişdilər. ABŞ prezidenti Donald Tramp da prezident İlham Əliyevə ünvanladığı təbrik məktubunda öz səmimiyyətini ifadə edib. Bu fonda Azərbaycan və ABŞ arasında münasibətlər artan xətt üzrə inkişaf edir.
Milli Məclisin deputatı Pərvanə Vəliyeva Crossmedia.az-a açıqlamasında ABŞ-Azərbaycan münasibətlərindən danışıb:
“Donald Trampın ABŞ-da hakimiyyətə gəlməsi ilə yeni dünya nizamı yaranır, Tramp öz ölkəsinin maraqlarını üstün tutmaqla yanaşı, dünyada mövcud münaqişə ocaqlarının sülhə nail olunmasına da yaxın dəstəyini göstərir. Donald Trampın birinci prezidentliyi dövründə də Azərbaycanla əlaqələrin inkişafına diqqət göstərirdi. Onun ikinci prezidentliyi müddətində də oxşar tendensiya müşahidə edilir. Ölkə prezidentinə Novruz bayramında, Müstəqillik günündə Tramp tərəfindən təbrik məktublarının göndərilməsi və burada verilən müsbət mesajlar Azərbaycan ABŞ əlaqələrinin yeni mərhələyə qədəm qoyduğunu göstərir. Trampın məktubları yalnız bir təbrik deyil, həm də siyasi mesajlardır. Burada terrorizmə qarşı mübarizə və təhlükəsizlik sahəsində əməkdaşlıq, enerji təhlükəsizliyinin inkişafı, iqtisadi və enerji əlaqələrinin genişləndirilməsi və s. kimi məsələlərdə ABŞ-ın Azərbaycanla əməldaşlıqda maraqlı olması bəyan olunmuşdur”.
Deputat həmçinin ABŞ-nin Azərbaycana olan dəstəyindən danışıb:
“Prezident İlham Əliyevin ABŞ Senatının Xarici Əlaqələr Komitəsinin üzvü, senator Stiv Deyns ilə bu günlərdə Bakıda görüşməsi də ölkəmizlə əlaqələrin inkişafına və bu kontekstdə atılan addımlardan biri idi. Həmin görüş zamanı Ölkə Başçısı Trampın məktubu barədə də qeyd etmişdir. Tramp məktubunda Azərbaycanla ABŞ arasında təhlükəsizlik, enerji və iqtisadi-ticari əlaqələrin daha da inkişaf etdirilməsi üçün geniş imkanlar olduğunu bildirir. ABŞ hazırda Azərbaycanla əlaqələrin inkişafına maraqlıdır, həmçinin, ölkəmizin Ermənistanla sülhün əldə olunmasına təşəbbüs göstərən tərəf kimi çıxış etməsi də onun beynəlxalq nüfuzunu artırır. Prezident İlham Əliyevə isə güclü siyasi iradəyə malik, regiona sülhü gətirən dövlət başçısı olaraq beynəlxalq ictimaiyyət tərəfindən böyük rəğbət bəslənir”.
Ayhan Ağarzayev
12:40 31.05.2025
Oxunuş sayı: 1473
