“Rusiya bölgədəki gərginlikdən narahatdırsa, məsuliyyət daşımalı olduğunu da anlamalıdır” - Politoloq
Rusiya müdafiə naziri Andrey Belousov “Ermənistanın Sünik bölgəsi (Qərbi Zəngəzur) ətrafında gərginlik davam edir” fikrini səsləndirib. Belousov bildirib ki, “Ermənistan-Azərbaycan münasibətlərinin qeyri-sabit vəziyyətindən narahatdırlar, Sünik rayonu ətrafında gərginlik qalmaqdadır. Moskva İrəvanla Bakı arasında sülh müqaviləsinin imzalanmasında maraqlıdır və hər cür kömək etməyə hazırdır”.
Mövzu ilə bağlı politoloq Aydın Quliyev Crossmedia.az-a açıqlama verib. Onun fikrincə, Belousovun bu açıqlamasında düşündürücü məqamlar çoxdur və bu, Rusiyanın bölgəyə baxışını göstərən mühüm siqnallardan biridir.
A.Quliyevin sözlərinə görə, bölgədə yaranmış vəziyyətlə bağlı Rusiyanın narahatlığı başadüşüləndir. Lakin əgər Moskva yalnız Sünik və ya Qərbi Zəngəzurla əlaqəli gərginlikdən narahatdırsa, bu zaman Rusiyanın mövqeyində səmimiyyət və tamlıq hiss olunmur. Politoloq qeyd edib ki, Ermənistan-Azərbaycan münasibətlərindəki gərginlik təkcə Süniklə məhdudlaşmır. Gərginlik bütün Azərbaycan-Ermənistan sərhədi boyunca, min kilometrdən artıq uzunluqda olan ərazidə mövcuddur və bu, Ermənistanın sülhə gəlmək istəməməsi ilə bağlıdır.
Aydın Quliyev bildirib ki, nə qədər ki, Ermənistan sülhə məcbur edilməyib, sərhədin istənilən nöqtəsində gərginlik və eskalasiya riski mövcud olacaq. Onun fikrincə, Rusiyanın narahatlığının əsas səbəbi Ermənistanın siyasəti nəticəsində bölgəyə kənar dövlətlərin müdaxilə imkanlarının yaranmasıdır. Politoloq bu narahatlığı haqlı saysa da, məsuliyyətin bir hissəsinin məhz Rusiyanın öz üzərinə düşdüyünü vurğulayıb.
Politoloq vurğulayıb ki, əgər Rusiya vaxtında Ermənistan-Azərbaycan münasibətlərinin sülhlə yekunlaşması üçün əlində olan təsir vasitələrindən istifadə etsəydi və sülh sazişi imzalansaydı, bu gün bölgəyə üçüncü dövlətlər müdaxilə etməzdi. Ermənistan isə Rusiyanın bu passiv siyasətindən istifadə edərək bölgəyə Fransa və digər qeyri-regional dövlətləri cəlb etməyə çalışır. A.Quliyev bildirib ki, Rusiya bölgədə yaranan vəziyyətə görə məsuliyyət daşıyır, çünki bölgədə sülhün bərqərar olunması üçün imkanları olsa da, onlardan tam istifadə etməyib.
A.Quliyev əlavə edib ki, Azərbaycanın da bu məsələdə Rusiyaya bənzər mövqeyi var – ölkə bölgəyə xarici dövlətlərin müdaxiləsinə qarşı çıxır. Azərbaycan “3+3” formatının işlək formaya çevrilməsində maraqlıdır. Lakin Ermənistan bu prosesdə pozucu rol oynayır və Rusiya tərəfindən bu pozuculuğa qarşı ciddi reaksiya verilməyib. Politoloqun sözlərinə görə, Rusiya yalnız siyasi bəyanatlarla kifayətlənir, halbuki Ermənistana qarşı ciddi təsir rıçaqları mövcuddur və bu imkanlardan istifadə olunmalıdır.
Aydın Quliyev sonda bildirib ki, “Azərbaycanla sülh sazişinin imzalanmasına imkan verməyən və burada pozucu rol oynayan Ermənistandır” və “Rusiya bu bölgədə sülh və təhlükəsizliyin taleyi üçün əsas təhlükənin Ermənistanın apardığı siyasətdən irəli gəldiyini başa düşməlidir”.
Fatimə Nəbiyeva
17:45 29.05.2025
Oxunuş sayı: 11753
