Mənəvi birlik işığında multikultural dəyərlər tədbirində kitab təqdimatı keçirilib
“Mənəvi birlik işığında multikultural dəyərlər” təbirində ilahiyyatçı-yazar Ağa Hacıbəylinin “Həqiqətin izində” kitabının təqdimat mərasimi keçirilib.
Crossmedia.az xəbər verir ki, tədbirdə Azərbaycan İlahiyyat İnstitutunun rektoru, dos., f.ü.f.d Aqil Şirinov, Azərbaycan Televiziya və Radio Verilişləri Qapalı Səhmdar Cəmiyyətinin sədr müavini, Əməkdar artist Rafiq Həşimov, Milli İrsi Mədəni Tarixi Araşdırmalar (MİMTA) Fondunun icraçı direktoru Pərviz Əmirov, araşdırmaçı-yazar Muxtar Cəfərli, Əməkdar incəsənət xadimi, jurnalist Şəfəq Sultan Əlixanlı, Qarabağ qazisi, jurnalist Rey Kərimoğlu, şəhid ailələri, qazilər, ictimaiyyət nümayəndələri və oxucular iştirak edib.
Tədbirə giriş sözü ilə açan Səyyarə Səyyaf qonaqları salamlayaraq multikulturalizm, Ağa Hacıbəylinin yaradıcılığı və kitabın insan həyatına təsiri barədə danışıb. Həmçinin, “Həqiqətin izində”nin nəşrindən, irfani və insani mesajlarının dəyərindən bəhs edərək müəllifə təşəkkür edib.
Daha sonra Aqil Şirinov, Rafiq Həşimov, Muxtar Cəfərli, Şəfəq Sultan Əlixanlı, Rey Kərimoğlu, şəhid ailələri və qazilər söz alaraq multikultural dəyərlərin təbliği və bu məsələdə tolerantlığın əhəmiyyəti, Ağa Hacıbəyli yaradıcılığı və kitab barədə fikirlərini bölüşüb, müəllifə gələcək işlərində uğurlar diləyiblər.
Öz növbəsində Ağa Hacıbəyli qonaqlara təşəkkür edib, deyilən xoş sözlərdən məmnunluğunu ifadə edərək “Həqiqətin izində” kitabının yazılma səbəbindən danışıb.
Qeyd edək ki, kitab dini-mənəvi məsələlərə toxunur, yaradılış həqiqətini və problemləri vəhdət halında təqdim edir. Həmçinin, əsərdə islami fikir məktəblərinə mötədil yanaşılır, onların Quran nuru ilə vəhdətinin mümkünlüyü vurğulanır və müsəlmanlar arasında qardaşlıq münasibətinin vacibliyi ön plana çıxarılır.
Nəzrin Salmanova
20:39 25.05.2025
Oxunuş sayı: 15077
