Memarlıq və dizayn sahəsinin öncül adları bir araya gələcək
30 mayda Bakı Konqres Mərkəzində keçiriləcək "InVision Design Talks & Visionary Design" Forumuna hazırlıq çərçivəsində mətbuat konfransı keçirilib.
Crossmedia.az xəbər verir ki, tədbirdə Türkiyənin Azərbaycan səfirliyinin mətbuat katibi Alptekin Cihangir İşbilir açılış çıxışı edib: "May ayı problemlərlə zəngin keçdi və bu çətinliklər fonunda şəhərləşmə məsələsinin diqqətdən yayınmaması üçün Seranit və Zivella şirkətlərinin birgə təşkilatçılığı ilə mühüm bir tədbir baş tutdu".
O daha sonra əlavə edib: “Bu məsələ bizim üçün olduqca önəmlidir. Həm Azərbaycanda, həm də Türkiyədə düzgün şəhərsalma, daha estetik və güclü şəhərlərin qurulması vacib amilə çevrilib. Bu, ortaq problemimiz olan zəlzələlər fonunda daha da aktuallaşır".
Cihangir İşbilir, “Dirəncli cəmiyyət, dirəncli şəhər” ifadəaini səsləndirərək əsas şüar kimi qeyd edib. O bildirib ki, bu təşəbbüs bundan sonra da davam etdiriləcək: “Bu tədbir bu yanaşma ilə başladı və elə bu şəkildə də davam edəcək. Əməkdaşlığınıza görə təşəkkür edirəm".
Alptekin Cihangir İşbilir qeyd edib ki, fəlakətlər baş verəndə xəbərə çevrilir, lakin həmin fəlakətlərin qarşısını almağa yönəlmiş layihələr, inşaat mərhələləri çox zaman diqqətdən kənarda qalır. Onun sözlərinə görə, diqqət göstərilmədiyi təqdirdə yanlış şəhərsalma ilə qarşılaşmaq mümkündür: “Biz həm dirəncli, həm də estetik şəhərlərin inşasına diqqət çəkmək istəyirik. Memarlarımızın bu tədbirdə iştirakı çox önəmlidir. Onlar ustalıq təlimlərinə də böyük əhəmiyyət verirlər".
Alptekin Cihangir İşbilir əlavə edib ki, bu ildən etibarən peşəkar təlimlərə başlanılıb və bu proses davam etdiriləcək: “Peşə təhsili dediyimiz bu proqram çərçivəsində bu il 30-a yaxın 3-4 saatlıq təlim planlaşdırılıb".
Sonda o, tədbirin təşkilinə görə iştirakçılara təşəkkür edib və gələcək planlardan bəhs edib: “İyul ayının əvvəlində eyni mövzu ətrafında Türkiyəyə səfər təşkil olunacaq. Bu səfərdə jurnalist dostlarımız da iştirak edəcək".
Seranit şirkətinin vitse-prezidenti Ufuk Polat 30 mayda Azərbaycanda keçiriləcək tədbir barədə açıqlama verib. Bildirib ki, bu tədbirdə yalnız memarlar deyil, həmçinin dizaynerlər də iştirak edəcək.
“Azərbaycandakı memar dostlarımızın iştirakı bizi çox sevindirir. Bu tədbir yalnız Azərbaycanda deyil, digər türk dövlətlərində də yayılacaq. İnşallah, Daşkənddə yenidən görüşəcəyik. Həmçinin, bir qismi Azərbaycanlı memarlarla əməkdaşlıq edən dostlarımız da tədbirdə iştirak edəcək" – deyə Ufuk Polat qeyd edib.
Sonda Zivella şirkətinin rəhbərlərindən olan Fatih Uzun, “bu gün burada çox dəyərli dostlarımızla bir araya gəldik. Bu önəmli gündə belə gözəl bir tədbirdə görüşmək bizim üçün çox qiymətlidir" – deyərək təşəkkürlərini bildirib.
Fatimə Nəbiyeva
Zəhra Ağayeva
13:45 23.05.2025
Oxunuş sayı: 14404
