Ziyəddin Göyüşovun fəlsəfi etik irsi ilə bağlı dəyirmi masa keçirilib
Mayın 20-də AMEA-nın Fəlsəfə və Sosiologiya İnstitutunda “Ziyəddin Göyüşovun fəlsəfi etik irsi və müasir etikanın aktual problemləri” mövzusunda dəyirmi masa keçirilib.
İnstitutdan Crossmedia.az-a bildirilib ki, tədbir Ziyəddin Göyüşovun 105 illik yubileyinə həsr olunub.
Tədbirdə Fəlsəfə və Sosiologiya İnstitutunun direktoru professor İlham Məmmədzadə görkəmli alim Ziyəddin Göyüşovun elmi fəaliyyəti haqqında geniş və əhatəli çıxış edib. O, Z.Göyüşovun Azərbaycan fəlsəfə tarixinə və etikaya dair dəyərli əsərlərin müəllifi olduğunu bildirib. Qeyd edib ki, alim Azərbaycanda ilk çoxcildli milli ensiklopediyanın yaradılmasında fəal iştirak edib, Azərbaycan Sovet Ensiklopediyası Elmi Şurasının üzvü olub. Z.Göyüşov sovet dönəmində yaşayıb fəaliyyət göstərsə də, vətənpərvər alim olması ilə hər zaman elmi müstəvidə milli məsələlərə daha çox diqqət ayırıb. Bu baxımdan Z.Göyüşovun əsərləri bu gün də yerli və beynəlxalq miqyasda alimlər tərəfindən oxunur və tədqiq edilir. İ.Məmmədzadə Z.Göyüşovun ensiklopedik alim olduğunu və onun əsərlərinin o dövrün gəncliyində böyük izlər buraxdığını qeyd edərək, həmin əsərlər sayəsində milli-mənəvi və elmi dəyərlərə sahib neçə-neçə alimlərin yetişdiyini vurğulayıb.
İ.Məmmədzadə görkəmli alimin əsərlərində milli maarifçilik məsələlərinin xüsusi yer tutduğunu və bu yolda apardığı tədqiqatlarda maarifçiliyin konturlarının bir az da genişləndiyini deyib. Bildirib ki, Z.Göyüşov “Azərbaycan maarifçilərinin etik görüşləri”, “Müasir burjua əxlaqının iflası”, “XX əsrin əvvəllərində Azərbaycan maarifçilərinin əsərlərində əxlaq məsələləri”, “Əxlaqi sərvətlər”, “XIX – XX əsrlərdə Azərbaycanda etik fikir”, “Həzz və iztirab”, “Fəzilət və qəbahət”, “Daxilə pəncərə” və s. sanballı fəlsəfi-etik əsərləri ilə dəyərli irs qoyub gedib.
Digər çıxış edənlər də Z.Göyüşovun Azərbaycan etik fikrinin tədqiqində əvəzedilməz rolundan danışıb və onun elmi əsərlərinin XX əsrin sonlarında və indi də Azərbaycan gənclərinin etik tərbiyəsində dəyərli mənbə olduğunu vurğulayıblar.
16:45 20.05.2025
Oxunuş sayı: 6920
