“Suverenlik və Konstitusiya: Gəncliklə gələcəyə” mövzusunda forum təşkil edilib
Azərbaycan Respublikasının insan hüquqları üzrə müvəkkilinin (ombudsmanın) və Azərbaycan Dillər Universitetinin (ADU) birgə təşkilatçılığı ilə “Konstitusiya və Suverenlik İli” çərçivəsində “Suverenlik və Konstitusiya: Gəncliklə gələcəyə” mövzusunda forum təşkil olunub.
Crossmedia.az xəbər verir ki, tədbirdə ombudsman Səbinə Əliyeva müstəqil respublikamızın tarixi inkişaf yolunda dövlət suverenliyinin və Azərbaycan Respublikasının Konstitusiyasının milli hüquq sistemimizin təməlini təşkil etdiyini bildirib. O, Ümummilli Lider Heydər Əliyevin bilavasitə müəllifi olduğu Azərbaycan Konstitusiyasının ölkəmizin hüquqi dövlət kimi inkişafının əsaslarını müəyyən etdiyini vurğulayıb.
Müvəkkil Ulu Öndərin müəyyən etdiyi və Prezident İlham Əliyevin uğurla davam etdirdiyi dövlətçilik strategiyası nəticəsində ölkəmizin ərazi bütövlüyü və suverenliyinin tam bərpa olunduğunu, Azərbaycanın 30 ilə yaxın Ermənistanın işğalı altında qalmış torpaqlarını geri qaytararaq, bölgədəki sülh və sabitliyin təmin olunmasına mühüm töhfə verdiyini qeyd edib.
Ombudsman insan hüquqlarının qorunması və demokratik inkişafın davamlı şəkildə təmin edilməsinin dövlətimizin qarşısında duran ən vacib vəzifələrdən olduğunu, bu istiqamətdə hər kəsin, o cümlədən gənclərin fəallıq göstərməsinin vacibliyini diqqətə çatdırıb.
Səbinə Əliyeva forum zamanı aparılan müzakirələrin və irəli sürülən təkliflərin gənclərin Konstitusiya və suverenlik məsələlərinə dair maariflənməsinə zəmin yaradacağını, bu kimi tədbirlərin gənclər arasında hüquq düşüncəsinin və hüquq mədəniyyətinin inkişafı baxımından əhəmiyyət daşıdığını qeyd edib.
Azərbaycan Dillər Universitetinin rektoru akademik Kamal Abdulla diqqətə çatdırıb ki, ölkəmizin suverenliyinin möhkəmləndirilməsi, insan hüquqlarının qorunması və müstəqil dövlət quruculuğu Ümummilli Lider Heydər Əliyevin zəngin dövlətçilik irsi kontekstində inkişaf edir. Azərbaycan dövləti müstəqilliyini bərpa etdiyi gündən etibarən hüquqi dövlət quruculuğu prosesinə xüsusi önəm verib və bu istiqamətdə böyük nailiyyətlər əldə olunub.
Sonra Bakı Dövlət Universitetinin Hüquq fakültəsinin dekanı Zaur Əliyev Azərbaycan Respublikasının Konstitusiyası və insan hüquqları”, ADU-nun Beynəlxalq münasibətlər və regionşünaslıq fakültəsinin dekanı İbrahim Kazımbəyli “Heydər Əliyev irsi, müstəqil dövlətçilik və müasirlik”, Təhsil fakültəsinin dekanı Hikmət Əlizadə “Suverenlik xalqın milli sərvətidir” və universitetin tələbəsi Leyla Rzazadə “İkinci Qarabağ müharibəsində informasiya cəbhəsi: Azərbaycan Dillər Universitetinin tələbə və akademik heyətinin dəstəyi” mövzularında çıxış ediblər. Çıxışlarda ölkəmizin suverenliyi, insan hüquqları və müstəqil dövlətçiliyin Heydər Əliyev irsi fonunda inkişafı vurğulanıb, milli dəyərlərin qorunması və hüquqi şüurun formalaşdırılmasının vacibliyi önə çəkilib. Eyni zamanda, gənclərin, eləcə də elm və təhsil ictimaiyyətinin dövlətçilik və informasiya təhlükəsizliyi məsələlərinə töhfə verməsinin əhəmiyyəti vurğulanıb. Həmçinin mövzular üzrə ətraflı fikir mübadilələri aparılıb, tədbir iştirakçılarını maraqlandıran suallar ətraflı cavablandırılıb.
16:42 20.05.2025
Oxunuş sayı: 7939
