Avropanın media tənzimləyiciləri Kişineuda bir araya gəldi
Moldovanın paytaxtı Kişineuda Avropa Tənzimləyici Orqanlarının Platformasının (EPRA) 61-ci toplantısı keçirilib.
Crossmedia.az xəbər verir ki, tədbirdə Azərbaycan Respublikasının Audiovizual Şuranın Aparat rəhbəri Fazil Novruzov iştirak edib.
Toplantının açılışında Moldova Respublikasının Prezidenti Maya Sandu salamlama nitqi ilə çıxış edib.
Avropanın audiovizual media tənzimləyicilərinin ən nüfuzlu şəbəkəsi olan EPRA-nın toplantısına Avropanın 48 dövlətindən 50 audiovizual media üzrə tənzimləyici orqanın rəhbərləri və nümayəndələri, həmçinin, Avropa Komissiyasının, ATƏT Media Bürosunun, Avropa Şurası Media Bölümünün, Avropa Audiovizual Obzervatoriyasının müşahidəçiləri, habelə UNESCO-nun, “Meta”, “Cullen İnternational” şirkətlərinin ekspertləri daxil olmaqla 150-dən çox nümayəndə və ekspert qatılıb.
Toplantıda “Onlayn mühitdə uşaqların müdafiəsi”, "Media savadlılığı", "Tənzimlləyicilər üçün yeni çağırışlar", “Video paylaşım və sosial şəbəkə platformaları, onların təsiri” mövzularında çıxışlar edilib. Həmçinin, tədbir çərçivəsində “Audiovizual media xidmətlərində alətlər və yanaşmalar” və “Media savadlılığı və hüquqlar” mövzularında panel sessiyalar təşkil olunub.
Toplantının ikinci günündə platformanın idarə heyətinə - sədr və sədr müavinləri postlarına seçkilər keçirilib. Səsvermənin sonunda İrlandiya yayım tənzimləyici orqanının rəhbəri Stefani Komey növbəti iki illik müddətə EPRA sədri seçilib. Həmçinin, Böyük Britaniyanın, Rumıniyanın, Monteneqro və Slovakiyanın tənzimləyici orqanlarının nümayəndələri sədr müavinləri seçiliblər.
22:48 16.05.2025
Oxunuş sayı: 12656
