Rostropoviçlərin ev-muzeyində Ulu Öndərə həsr olunmuş tədbir keçirilib
Leopold və Mstislav Rostropoviçlərin ev-muzeyində Azərbaycanın Ümummilli Liderinin anadan olmasının 102-ci ildönümünə həsr olunmuş “Heydər Əliyevin izi ilə” adlı tədbir keçirilib.
Crossmedia.az xəbər verir ki, tədbir “İçərişəhər” Dövlət Tarix-Memarlıq Qoruğu İdarəsinin, “İçərişəhər” Muzey Mərkəzinin və Rostropoviçlərin ev-muzeyinin dəstəyi ilə keçirilib.
Ev-muzeyinin icraçı direktoru Günay Əliyeva tədbir iştirakçılarını salamlayaraq Heydər Əliyevin dahi musiqiçi, violonçel ifaçısı Mstislav Rostropoviçlə dostluğundan, onların Azərbaycanda mədəniyyətin inkişafına verdiyi töhfələrdən danışıb.
Azərbaycan televiziyasının arxivindən Mstislav Rostropoviçin Bakıda keçirilən konsertindən sonra Heydər Əliyev ilə onun arasında səmimi söhbəti əks etdirən kadrlar nümayiş etdirilib.
Tədbir Bülbül adına Musiqi Kollecinin tələbələrinin hazırladığı konsert proqramı ilə davam edib.
İstedadlı musiqiçilərin ifasında F.Sücəddinov, N.Əliverdibəyov, Ü.Hacıbəyli, F.Şopen və S.Prokofyev kimi tanınmış bəstəkarların “Vətən haqqında ballada”, “Vals-Skertso”, “Cəngi” və digər əsərləri səsləndirilib.
Qonaqlar muzey kolleksiyalarından Heydər Əliyevin və Mstislav Rostropoviçin həyat və fəaliyyətinin parlaq anlarını əks etdirən nadir fotoşəkillərin nümayiş olunduğu “Heydər Əliyevin izi ilə” fotosərgisinə də baxıblar.
Ev-muzeyinin icraçı direktoru G.Əliyeva jurnalistlərlə söhbətində bugünkü tədbirin əhəmiyyətini vurğulayıb. O deyib: “Bu tədbiri maestro Rostropoviçlə qırx ilə yaxın səmimi dostluq münasibəti olan Ümummilli Lider Heydər Əliyevin anadan olmasının 102-ci ildönümünə həsr etdik. Biz böyük musiqiçinin xatirəsinin yad edildiyi bu divarlar arasında təkcə onun yaradıcılıq yolunu deyil, həm də iki böyük şəxsiyyəti birləşdirən xüsusi, səmimi dostluğu əbədiləşdirməyə və qoruyub saxlamağa çalışırıq”.
Qeyd edək ki, tədbirdə Rusiyanın Azərbaycandakı səfirliyinin nümayəndələri, müxtəlif şəhər muzeylərinin direktorları və əməkdaşları, musiqisevərlər iştirak ediblər.
Tədbirin sonunda iştirakçılara təşəkkürnamələr təqdim olunub.
20:30 07.05.2025
Oxunuş sayı: 10387
