Heydər Əliyevin 102 illiyinə həsr olunmuş tədbir keçirilib
Bu gün Azərbaycan Respublikasının Gənclər Fondu, Gənclərin Maarifləndirilməsinə Dəstək İctimai Birliyi və Gənc Könüllülərin təşkilatçılığı ilə Dövlət Təhlükəsizlik Xidmətinin (DTX) Mədəniyyət Mərkəzində, Ümummilli lider Heydər Əliyevin 102 illiyinə həsr olunmuş tədbir həyata keçirilib.
Crossmedia.az xəbər verir ki, tədbirdə ilk olaraq Dövlət himni səsləndirilib, daha sonra vətən uğrunda canlarını fəda etmiş şəhidlərimizin və Ümummilli lider Heydər Əliyevin əziz xatirəsi bir dəqiqəlik sükutla yad edilib.
Tədbirin gedişatında Ulu Öndərin uzaqgörən siyasəti, ölkəmiz üçün etdiyi fədakarlıqlardan bəhs edilib və videoçarx təqdim olunub. Tədbirin açılışını Gənclər Fondunun icraçı direktoru Qədir Xəlilov edib.
Q.Xəlilov çıxışında bildirib: “Əziz gənclərimiz, artıq bir neçə ildir ki, Gənclər Fondu və Gənclər Təşkilatı ilə birgə keçirdiyimiz bu ənənəvi tədbirdə sizi görməkdə şadam. Ulu Öndərimizin irsinin öyrədilməsi, onun keçdiyi həyat yolunun öyrənilməsi uzun illər araşdırmalara baxmayaraq, daha sonra da araşdırılmağa davam edəcək. Müasir Azərbaycanımızın bu il qeyd etdiyimiz “Konstitusiya və Suverenlik” ili xalqın Ulu Öndərə olan xüsusi qayğısının göstəricisidir. Bu cür tədbirlər məhz sizlərlə birlikdə davamlı olacaq və bu baxımdan da silsilə tədbirlərin keçirilməsinə şərait yaradacaq. Burada mədəni tədbirlərin həyata keçirilməsi, Ulu Öndərimizin irsinin öyrənilməsi, onun tərəfindən sevilən mahnıların yenidən gənclərə aşılanması üçün əsas məqamlardan biridir. Ulu Öndər irsi dedikdə, ölkəmizdə mümkün ola biləcək bütün məsələlərdə, faydalı ola biləcək bütün sahələrdə onun imzasını görürük. Xüsusi olaraq nəzərə alsaq ki, “Konstitusiya və Suverenlik” ilidir, 30 il öncə - 1995-ci ildə Konstitusiyanın qəbul olunmasında, ən təcrübəli hüquqşünasların bir araya gətirilməsində Ulu Öndərin rolu danılmazdır.”
Qeyd edək ki, tədbirdə Ümummilli Liderin hörmət bəslədiyi şairlərdən olan Səməd Vurğunun “Azərbaycan” şeiri səsləndirilib. Eyni zamanda, Ulu Öndər tərəfindən sevilən musiqilər təqdim olunub. Fərid Abışovun ifasında tar alətində “Ay Laçın, ay Laçın”, Nargilənin ifasında “Eşqin Əmrahı”, Elvin Məmmədov ansamblının ifasında “Alagöz”, Cəmilə Məmmədovanın ifasında Ulu Öndərin vaxtilə Rəşid Behbudovla birgə səsləndirdiyi “Küçələrə su səpmişəm” mahnıları səsləndirilib. “Azəri İncilər” qrupu da səhnədə çıxış edib.
Bundan əlavə, Azərbaycan Dillər Universitetinin (ADU) “Dalğa” rəqs ansamblı tərəfindən “Qaval” rəqsi təqdim olunub və kiçiklərin tamaşaçılarla birgə “Qurban olum Azərbaycan” və “Qarabağ” musiqisi səsləndirilmişdir.
Tədbirdə Azərbaycan Respublikasının Xalq artisti Zaur Rzayev tədbir iştirakçıları ilə birgə “Can Azərbaycan” mahnısını ifa edib.
Sonda Gənclərin Maarifləndirilməsinə Dəstək İctimai Birliyinin sədri Aynurə Ələkbərli çıxış edərək Azərbaycan Könüllülər İttifaqına, Gənclərin İctimai Birliyinin komandasına və onun təmsilçilərinə təşəkkürünü bildirib.
Mədinə Cəlilova
22:15 06.05.2025
Oxunuş sayı: 11300
