“Ətraf mühiti qoru”: maarifləndirmə aksiyaları”: QHT layihənin icrasına başladı
“Yaşıl Dünya” Ekoloji Maarifləndirmə İctimai Birliyi Azərbaycan Respublikasının Qeyri-Hökumət Təşklatlarına Dövlət Dəstəyi Agentliyinin maliyyə dəstəyi ilə həyata keçirdiyi “Ətraf mühiti qoru”: maarifləndirmə aksiyaları” layihəsinin icrasına başlayıb.
Crossmedia.az xəbər verir ki, bu barədə təşkilatın sədri, layihənin rəhbəri Elman Cəfərli məlumat verib.
“Son illər planetimizdə baş təbii fəlakətlər, qlobal istiləşmə, sel və daşqınlar, torpaq sürüşmələri ciddi narahatlıq yaradıb. Təbii ehtiyatlardan israfçılıqla istifadə üzündən yaşıllıqlar, canlı aləm məhv edilir, ekoloji tarazlıq pozulur. Ətraf mühitin saflaşdırılmasında, mühafizəsində meşələrin, yaşıllıqların rolu ölçüyəgəlməz dərəcədə böyükdür. Təbiətin mühafizəsinin gücləndirilməsində, bununla bağlı maarifləndirmə işinin aparılmasında ictimai fəalların, KİV-in gənc nəslin tərbiyəsi ilə məşğul olan pedaqoqların üzərinə mühüm vəzifələr düşür”-deyən, QHT sədri bildirib ki, gənc nəsildə ekoloji şüurun formalaşdırılması erkən yaşlarından başlanmalıdır:
“Ekoloji tərbiyə ətraf mühitin dərk olunması və təbiətə qayğı ilə yanaşmanın formalaşması proseslərindən keçir. Uşağa kiçik yaşlarından təbiətə qayğı ilə yanaşmanı aşılamaqla biz onun şəxsiyyətinin formalaşmasına ciddi təkan vermiş oluruq.
Yeni nəsildə vətəndaş şüurunun formalaşdırılmasının əsas istiqamətlərindən biri də məhz ekoloji təhsil və tərbiyə olmalıdır. Bu yolla gəncləri doğma torpağı və təbiəti sevməyə, ətraf mühitə biganəlikdən qaçmağa öyrədə bilərik. Hər bir insan dərk etməlidir ki, ətraf mühitin çirklənməsinin aradan qaldırılması onun ekoloji mədəniyyəti, tərbiyəsi və təhsilindən asılıdır”.
Elman Cəfərli bildirib ki, layihə çərçivəsində Bakı, Xaçmaz və Ağdamda maarifləndirmə tərbirləri: ictimai müzakirələr, dəyirmi masalar təşkil olunacaq, ekoloqların və pedaqoqların, alimlərin iştirakı ilə video-müsahibələr hazırlanacaq. Hazırlanan video-materiallar sosial şəbəkələrdə paylaşılacaq. Bundan başqa sahə üzrə ekspertlərin rəyləri ilə məqalələr hazırlanıb kütləvi informasiya vasitələrində yayımlanacaq.
E.Cəfərli layihəni dəstəklədiyinə görə, Azərbaycan Respublikasının Qeyri-Hökumət Təşklatlarına Dövlət Dəstəyi Agentliyinə təşəkkürünü bildirib.
09:33 01.05.2025
Oxunuş sayı: 13452
