Azərbaycan və İran heç vaxt düşmən ola bilməz – DEPUTAT
İran Prezidentinin Azərbaycana rəsmi səfəri, iki ölkə arasındakı münasibətlərin strateji əhəmiyyətini bir daha ortaya qoydu. Görüş zamanı Azərbaycanın və İranın qarşılıqlı maraqları və gələcək əməkdaşlıq sahələri müzakirə olundu.
Azərbaycan–İran münasibətlərinə dair mövqeyini Milli Məclisin deputatı Anar İsgəndərov Crossmedia.az-a şərh edib. O bildirib ki, iki xalqı birləşdirən dərin tarixi bağlar bu gün də dövlətlərarası münasibətlərdə mühüm rol oynayır:
“Azərbaycan və İran qonşu dövlətlərdir və xalqları yüzillərlə davam edən ortaq tarix, mədəniyyət və dini dəyərlərlə bir-birinə bağlıdır. Müxtəlif dövrlərdə hər iki xalq eyni məqsəd uğrunda mübarizə aparıb, çiyin-çiyinə çalışıb.
1918-ci ildə Azərbaycan Xalq Cümhuriyyəti yarandıqdan sonra Azərbaycan və İran arasında dövlət səviyyəsində münasibətlər formalaşmağa başlayıb. 1920-ci il martın 21-də İran Azərbaycanı həm defakto, həm də de-yure tanıyan ilk dövlət olub.
İranın həmin dövrdə imzaladığı müqavilə digər dövlətlərlə bağladığı müqavilələrdən daha güclü idi və daha çox siyasi çəkisi var idi “.
Anar İsgəndərov xatırladıb ki, sovet dövründə, yəni yetmiş il ərzində, Azərbaycan SSRİ-nin tərkibində olduğuna görə İranla birbaşa əlaqələr qurmaq imkanı olmayıb. Lakin müstəqillik bərpa olunduqdan sonra Azərbaycan və İran arasında bütün sahələr üzrə, o cümlədən diplomatik münasibətlər yenidən qurulub:
“1991-ci ildən bu günə qədər İranın bəzi tarixçiləri və siyasətçiləri Azərbaycanla bağlı ziddiyyətli fikirlər səsləndirsələr də, reallıq dəyişmir. Bu iki dövlət qonşudur və bu coğrafiyada bir-birindən ayrı düşünülə bilməz. Azərbaycan dəfələrlə bəyan edib ki, onun ərazisindən İran üçün heç bir təhlükə yarana bilməz və heç bir xarici qüvvə Azərbaycan ərazisindən istifadə edə bilməz. Bu, Azərbaycanın İranla münasibətlərdə səmimi və qarşılıqlı hörmətə əsaslanan siyasətinin göstəricisidir”, – deyə deputat vurğulayıb”.
Anar İsgəndərov iki ölkə prezidentlərinin son görüşünü də müsbət qiymətləndirib və əlavə edib ki, bu görüş münasibətlərin inkişafı baxımından əhəmiyyətli mesajlar verdi:
“Bəli, zaman-zaman soyuq münasibətlər yaşana bilər. Bu, beynəlxalq münasibətlərdə baş verə biləcək təbii haldır. Amma Azərbaycan və İran heç vaxt düşmən ola bilməz. Bu dövlətlər bir-birinə nifrət edə bilməz, çünki onları birləşdirən ortaq maraqlar, dini dəyərlər və tarixi bağlılıq var ”.
Deputatın fikrincə, İran Prezidentinin Azərbaycana səfəri münasibətlərə aydınlıq gətirdi və əməkdaşlığın yeni mərhələsinə yol açdı:
“Azərbaycan bu gün qalib dövlətdir. Artıq Azərbaycan nə kiminsə diktəsini qəbul edir, nə də kiməsə tabe olur. Azərbaycanın xarici siyasəti müstəqildir və bu, İranla münasibətlərə də aiddir. Hesab edirəm ki, qarşıdakı illərdə Azərbaycan və İran arasında əlaqələr, xüsusilə iqtisadi və nəqliyyat sahəsində daha da dərinləşəcək. Dəmir yolu layihələri və regional əməkdaşlıq bu istiqamətdə mühüm rol oynayacaq ”.
Həmayıl Şükürlü
21:23 29.04.2025
Oxunuş sayı: 13581
