Məhkəmə prosesi beynəlxalq hüquq normalarına uyğun aparılır - DEPUTAT
Azərbaycan Xarici İşlər Nazirliyi bəyan edib ki, Ermənistanın Azərbaycanda mühakimə olunan 15 hərbi cani ilə bağlı Beynəlxalq Ədalət Məhkəməsinə etdiyi müraciət təmin olunmayıb. Məhkəmə Ermənistanın iddiasını rədd edərək, əlavə araşdırma və ekspert rəyi tələb etməməyə qərar verib.
Mövzu ilə bağlı Crossmedia.az-a açıqlama verən Milli Məclisin deputatı Könül Nurullayeva bildirib ki, Ermənistanın beynəlxalq ictimaiyyəti aldatmaq cəhdləri bir daha iflasa uğradı. Onun sözlərinə görə, 2020-ci il Vətən müharibəsi zamanı və sonrakı dövrdə törədilmiş cinayətlərlə bağlı Bakı Hərbi Məhkəməsi tərəfindən Ruben Vardanyan və digər 15 erməniəsilli şəxsin mühakiməsi davam edir və Ermənistanın bu prosesə müdaxilə cəhdləri nəticəsiz qaldı.
Deputat qeyd edib ki, Beynəlxalq Qızıl Xaç Komitəsi əməkdaşları da mütəmadi olaraq təqsirləndirilən şəxslərə baş çəkir, onların saxlanma şəraitini yoxlayır və bu günə qədər hər hansı neqativ hal qeydə alınmayıb. Könül Nurullayeva əlavə edib ki, hətta təqsirləndirilən şəxslər – məsələn, Davit Babayan – açıq məhkəmə iclaslarında saxlanma şəraitindən razılıq ifadə edib, heç bir təzyiqlə üzləşmədiklərini bildirib.
Deputatın sözlərinə görə, Ermənistanın silahlı qüvvələrinin Azərbaycan torpaqlarını işğal etməsi və Azərbaycan xalqına qarşı etnik təmizləmə siyasəti faktları da bu məhkəmə prosesi çərçivəsində bir daha təsdiqini tapır. Arayik Harutyunyan və digər təqsirləndirilən şəxslər ifadələrində cinayət əməllərinin Ermənistanın siyasi-hərbi rəhbərliyinin əmri ilə həyata keçirildiyini etiraf ediblər.
Könül Nurullayeva əlavə edib ki, ötən gün məhkəmədə Şuşa rayonunun işğalı və Xocalı soyqırımı ilə bağlı zərərçəkənlərin ifadələri dinlənilib. O, bildirib ki, Madat Babayan da Xocalı faciəsində iştirakını etiraf edib. Deputat vurğulayıb ki, Azərbaycan məhkəmə prosesi beynəlxalq hüquq normalarına tam uyğun, şəffaf və obyektiv şəkildə aparılır.
Toğrul Əhmədzadə
11:26 27.04.2025
Oxunuş sayı: 14867
