Azərbaycanın təxribat və dezinformasiyalara təsirli cavab verəcəyi şübhəsizdir - AÇIQLAMA
Ermənistanın son dövrlərdə ard-arda təxribat və dezinformasiyalarını artırması, dövlət sərhədinin müxtəlif istiqamətlərində sabitliyin məqsədyönlü şəkildə pozulması müşahidə olunmaqdadır. Ən son Ermənistan MN-in yaydığı açıqlamaya görə, Xəznəvar yaşayış məntəqəsinin “Azərbaycan tərəfindən atəşə tutulması” dezinformasiyası da buna hesablanıb.
Bəs Ermənistanın artan və intensivləşən təxribatları fonunda Azərbaycan hansı addımları ata bilər?
Mövzu ilə bağlı Crossmedia.az-a açıqlama verən ehtiyatda olan zabit, hərbi ekspert Ədalət Verdiyev bildirib ki, Ermənistanın bu təxribatları hansısa ağır nəticələrə gətirib çıxarsa, Azərbaycan daha əvvəllər də olduğu kimi Ermənistanı növbəti dəfə cəzalandıracaq və bunun məsuliyyəti də tam Ermənistan rəhbərliyi üzərinə düşür:
“Azərbaycanın bu təxribat və dezinformasiyalara təsirli cavab verəcəyi heç kəsdə şübhə doğurmamalıdır. Azərbaycan tərəfinin səbrli davranmasının səbəbi sadəcə sülh müqaviləsinə hansı dərəcədə sadiq olduğunu göstərməsi və ordumuzun hərbi qulluqçuları ilə mülki əhali arasında bu təxribatlar nəticəsində xəsarət alanların olmaması ilə əlaqədardır. Azərbaycan tərəfi mülki əhaliyə toxunmadığını II Qarabağ müharibəsində də sübut edib və hətta aralarında gizlənən erməni hərbi qulluqçularının təhlükəsiz şəkildə bölgəni tərk etməsinə şərait yaradıb. Ermənistan rəhbərliyinin yaydığı bu dezinformasiyalar törədilən təxribatlardan beynəlxalq ictimaiyyətin diqqətini yayındırmağa hesablanıb”.
Asif Alpsoy
21:52 25.04.2025
Oxunuş sayı: 890
