Qaribaşvili siyasətdən getdi: Gürcüstanda nələr olacaq?
Gürcüstanda hakim "Gürcü Arzusu - Demokratik Gürcüstan" partiyasının sədri İrakli Qaribaşvili siyasətdən getdiyini elan edib.
O, bu barədə partiyanın ofisində keçirdiyi brifinqdə bildirib.
"Bu gün sizə siyasətdən getmək qərarımla bağlı məlumat vermək istəyirəm. Bildiyiniz kimi, son bir neçə həftə ərzində gələcək siyasi fəaliyyətimlə bağlı spekulyasiyalar səngimir. Buna görə də cəmiyyət qarşısında mövcud suallara dolğun cavab verməyə borcluyam", - İ.Qaribaşvili qeyd edib.
İ.Qaribaşvili 2024-cü il fevralın 1-də hakim partiyanın sədri seçilmişdi.
O, iki dəfə Gürcüstanın Baş naziri olub.
Siyasətçinin sözügedən qərarı barədə Crossmedia.az-a danışan siyasi ekspert Turab Rzayev söyləyib ki, Gürcüstanda partiya rəhbərinin, eləcə də bəzi xüsusi və kiçik partiyaların fəaliyyəti o qədər də əhəmiyyət daşımır: “Burada əslində hamının bildiyi bir reallıq var: hökuməti qurmaq üçün real fürsətlər mövcud deyil, sadəcə konsolidasiyaya dair görüntü yaradılır. Çünki faktiki olaraq əksəriyyət bilir ki, bu partiyanı əslində oliqarx Bidzina İvanişvili idarə edir. Ona görə də, məsələn, Qaribaşvilinin partiyanı tərk etməsi və rəhbər postundan getməsi böyük bir siyasi qarşıdurma və ya dəyişiklik yaratmayacaq. Hər hansı bir dəyişikliyin ciddi təsirə səbəb olacağını düşünmək çətindir”.
O, əlavə edib ki, bu prosesdə "Gürcü Arzusu" Partiyasının fəxri sədri və təsisçisi Bidzina İvanişvili və onun partiyasının müəyyən manevr imkanları olur: “O, bu imkanları özünəməxsus üsullarla tənzimləməyə çalışır. Fakt budur ki, hələ də partiya üzərində əsas nəzarət İvanişvilinin əlindədir və o, bu nəzarəti itirməyib. Qaribaşvilinin və ya digər yüksək vəzifəli şəxslərin gedişi simvolik xarakter daşıyır. Bu cür dəyişikliklər hələlik real güc balansına təsir etmir. Bənzər nümunələri biz müxalifət düşərgəsində də görmüşük — orada da insanlar təhlil edib, xəyanətdən danışıb, dəyişiklik tələb edib, amma nəticə dəyişməyib. Nəticədə isə əhali yenə də eyni partiyada qalmağa davam edib. Digər partiyalara dəstək isə nisbətən zəif və mürəkkəb olub".
Bənövşə Zahidli
20:05 25.04.2025
Oxunuş sayı: 1568
