"Çinə vizanın ləğvi azərbaycanlı sahibkarlar üçün yeni imkanlar yaradır" -RƏY
Azərbaycan Prezidenti İlham Əliyevin Çinə dövlət səfəri tərəflər arasında əməkdaşlıq məsələlərini yenidən gündəmə gətirir. Dövlətlər arasında son illərdə inkişaf edən əməkdaşlıq, yeni müqavilələr və iqtisadi təşəbbüslərlə daha da güclənir.
Çin İctimai Elmlər Akademiyasının Rusiya, Şərqi Avropa və Mərkəzi Asiya Tədqiqatları İnstitutunun elmi işçisi Yan Tszin bildirib ki, Prezident İlham Əliyevin Pekinə dövlət səfəri çərçivəsində imzalayacağı müqavilələr Azərbaycan və Çin arasında strateji tərəfdaşlığı daha da möhkəmləndirəcək.
Onun sözlərinə görə, Azərbaycan və Çin mühüm strateji tərəfdaşlardır.
Ekspert vurğulayıb ki, Bakı və Pekin ötən il Şanxay Əməkdaşlıq Təşkilatı (ŞƏT) çərçivəsində strateji əməkdaşlıq müqaviləsi imzalayıblar.
"Bu bizim münasibətlərimiz üçün çox vacibdir. Azərbaycan Prezidenti İlham Əliyevin Çinə indiki dövlət səfəri Bakı ilə Pekin arasında tərəfdaşlığın inkişafı üçün mühüm əhəmiyyət kəsb edir", - o əlavə edib.
Yan Tszin səfər çərçivəsində ikitərəfli münasibətlərin dərinləşdirilməsinə yönəlmiş yeni müqavilələrin imzalanacağına əminliyini ifadə edib.
"Bütün bu müqavilələr strateji tərəfdaşlığımızın inkişafına kömək edəcək. İki ölkə arasında çox yaxşı qarşılıqlı anlaşma, etimad, yaxşı siyasi münasibətlər var", - ekspert bildirib.
Bakı və Pekin arasında artan əməkdaşlıq perspektivləri barədə Crossmedia.az-a danışan Milli Məclisin dörd çağırış deputatı iqtisadi elmləri doktoru, professor Rüfət Quliyev bildirib ki, Azərbaycanla Çin arasında münasibətlər daha da inkişaf edir: "Bu əlaqələr yüksək templə irəliləyir və əsasən iqtisadi, siyasi, beynəlxalq əməkdaşlıq, yaşıl energetika və nəqliyyat sahələrini əhatə edir. Mənim üçün ən maraqlı məqam ondan ibarətdir ki, artıq Azərbaycan vətəndaşları Çinə vizasız səfər edə biləcəklər. Bu isə xüsusilə sahibkarlar üçün əlverişli imkanlar yaradır. Əvvəllər turistlər üçün viza tələb olunurdu, lakin sahibkarlıq fəaliyyəti ilə məşğul olan şəxslərə çoxgirişli (multiviza) vizalar lazım idi. Bu nöqteyi-nəzərdən sahibkarların sayı da artacaq. Ümumilikdə isə bütün sahələrdə yüksəliş müşahidə olunur və artıq münasibətlərimizə "strateji tərəfdaşlıq" adı verilib".
Bənövşə Zahidli
15:01 23.04.2025
Oxunuş sayı: 13935
