Bakıda Türk Dövlətləri Təşkilatının Kosmik Agentliklərinin 4-cü görüşü keçirilir
Bu gün Bakıda Rəqəmsal İnkişaf və Nəqliyyat Nazirliyi yanında Kosmik Agentliyin ("Azərkosmos") ev sahibliyi ilə Türk Dövlətləri Təşkilatına (TDT) üzv ölkələrin Kosmik Agentliklərinin və aidiyyəti qurumlarının rəhbərlərinin 4-cü illik görüşü keçirilir.
Crossmedia.az xəbər verir ki, bu strateji toplantı, türk dövlətlərinin kosmik sahədə qarşılıqlı əlaqələrini gücləndirmək, regional innovasiya və elmi-texniki tərəfdaşlığı təşviq etmək məqsədi daşıyır.
Əməkdaşlığın mərkəzində ortaq texnologiyaların yaradılması, insan kapitalına yatırımlar və kosmosun dinc məqsədlərlə istifadəsi dayanır.
TDT çərçivəsində möhkəmlənən əməkdaşlıq və Türk dövlətlərinin kosmik sahədəki birliyi müasir dövrdə sadəcə mənəvi bağları deyil, strateji maraqları da əks etdirir. Bu əməkdaşlıq regionun texnoloji müstəqilliyini artırmaqla yanaşı, onun beynəlxalq kosmik gündəmdə daha fəal rol oynamasına şərait yaradır.
Toplantı çərçivəsində aşağıdakı mühüm məsələlər müzakirə edilir.
- Birgə CubeSat layihəsi: TDT çərçivəsində icra ediləcək bu peyk təşəbbüsü, üzv ölkələr arasında texniki bilik mübadiləsini genişləndirməklə yanaşı, karbon dioksid və metan kimi istixana qazlarının monitorinqi vasitəsilə iqlim dəyişikliklərinə qarşı mübarizəyə töhfə verəcək.
- Kosmos sahəsində hüquqi çərçivənin standartlaşdırılması: Azərbaycan tərəfindən təklif edilən bu təşəbbüs, ortaq hüquqi baza yaratmaqla gələcək birgə layihələrin reallaşdırılmasını asanlaşdıracaq. Tətbiq olunacaq model, BMT-nin kosmosla bağlı beynəlxalq müqavilələrinə uyğun şəkildə hazırlanacaq.
- Virtual Kosmik Akademiyanın yaradılması: 21 aparıcı universitetin iştirakı ilə qurulacaq bu rəqəmsal platforma, regionun gənc istedadlarına daha geniş təhsil imkanı yaradacaq və Azərbaycanın gələcəkdə kosmik təhsil və innovasiya mərkəzi kimi mövqeyini gücləndirəcək.
- GUHEM Kosmos Düşərgəsi və təhsil layihələri: Türkiyədə baş tutacaq düşərgənin təqdimatı ilə yanaşı, coğrafi informasiya sistemləri (GIS) üzrə təlimlərin TDT ölkələrində tətbiqi məsələsi də gündəmə gətirildi.
- Türk Dünyası təşkilatlarının kosmik agentliklilərinin görüşlərinin mütəmadi təşkili : Bu təşəbbüs sayəsində üzv və müşahidəçi ölkələr arasında əməkdaşlıq və bilik mübadiləsi sistemli şəkildə həyata keçiriləcək.
11:22 23.04.2025
Oxunuş sayı: 730
