Gənclərin şəxsiyyət axtarışı müzakirə edildi: Dr. Ali Can Bakıda gənclərlə görüşdü
Türk Əməkdaşlıq və Koordinasiya Agentliyinin (TİKA) dəstəyi və Bakı İstedadlı Gənclər Akademiyasının təşkilatçılığı ilə Gəncliyə Yardım Fondunda “Müasir Gəncliyin Şəxsiyyət Axtarışı” mövzusunda seminar təşkil olunub. Gənclərin inkişafına və onların cəmiyyətə inteqrasiyasına töhfə verməyi hədəfləyən tədbirdə müxtəlif mövzularda fikir mübadiləsi aparılıb.
Crossmedia.az xəbər verir ki, seminarda Əziz Mahmud Hudayi Vəqfinin təhsil koordinatoru, sosioloq Dr. Ali Can çıxış edib. Tədbir iştirakçıları ilə səmimi şəkildə bölüşdüyü fikirlərində Dr. Ali Can müasir dövrdə gənclərin qarşılaşdığı problemlər və ciddi təhdidlər haqqında ətraflı danışıb. O, gənclərlə bağlı məsələlərin hər zaman aktual mövzu olduğunu bildirərək, bu problemlərin yalnız gənclərin milli-mənəvi dəyərlərinə, tarixinə, mədəniyyətinə və milli kimliyinə sahib çıxması və bu dəyərlərə sadiq qalması ilə aradan qaldırıla biləcəyini qeyd edib.
Dr. Ali Can, həmçinin müasir gəncliyin öz genetik və milli kodları əsasında formalaşmasının vacibliyini xüsusi vurğulayıb. Onun çıxışı iştirakçılar tərəfindən maraqla qarşılanıb və seminar boyunca mövzu ətrafında canlı diskussiyalar aparılıb.
Sonda iştirakçıların sualları cavablandırılıb və seminarın sonunda Bakı İstedadlı Gənclər Akademiyası tərəfindən qonağa xatirə hədiyyəsi təqdim olunub.
Fatimə Nəbiyeva
Zeynəb Yunuszadə
17:00 19.04.2025
Oxunuş sayı: 13636
