Bakıda Beynəlxalq İnvestisiya Forumu keçiriləcək
Bu ilin iyun ayında Bakıda Beynəlxalq İnvestisiya Forumunun keçirilməsi gözlənilir.
Crossmedia.az xəbər verir ki, bunu İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Bakıda keçirilən Azərbaycan-Moldova biznes forumunda bildirib.
"Bu platformadan istifadə edərək xarici tərəfdaşlarlarımızı forumda iştiraka dəvət edirəm. Tədbiri AZPROMO və İtaliyanın "The European House Ambrosetti” təşkilatı ilə birgə təşkil edəcək", - deyə o qeyd edib.
Y.Abdullayev əlavə edib ki, AZPROMO və onun Moldovadan olan tərəfdaşları arasında əməkdaşlıq ardıcıl və dinamik şəkildə inkişaf edir: "Son bir neçə il ərzində Moldovanın Sahibkarlığın İnkişafı Təşkilatının (ODA) və "İnvest Moldova" Agentliyinin nümayəndələri ilə bir sıra məhsuldar görüşlər keçirilib. AZPROMO ilə "İnvest Moldova" arasında qeyri-neft sektoruna xarici investisiyaların cəlb edilməsi və Azərbaycan məhsullarının ixracının stimullaşdırılması sahəsində əməkdaşlığın genişləndirilməsini nəzərdə tutan Anlaşma Memorandumu mövcuddur. Biz əməkdaşlığımızı dərinləşdirmək üçün fəal işləməyə davam edirik".
16:08 11.04.2025
Oxunuş sayı: 9451
