Bakı Metropolitenində təmir işlərinə nə vaxtdan başlanacaq? - ÖZƏL
"Bakı Metropoliteni" QSC-nin sədrinin müşaviri Emil Əhmədovun bu günlərdə verdiyi açıqlama cəmiyyətdə ciddi maraq doğurub. Belə ki, o, bildirib ki, Qırmızı və Yaşıl xətlərin ayrılması çərçivəsində bu il "Cəfər Cabbarlı" və "Nizami" stansiyaları arasında təxminən 200 metrlik uzunluğa malik tunel tikiləcək.
"Bu ildən metroda həmin xətlərin ayrılması nəzərdə tutulur. Bu da hər bir xəttin müstəqil işləməsinə, idarəetmənin səmərəliyinin və sərnişindaşıma keyfiyyətinin artırılmasına imkan yaradacaq. Həmçinin sərnişin axınının daha səmərəli tənzimlənməsi üçün “28 May” və “Cəfər Cabbarlı” stansiyaları arasında əlavə keçid də tikiləcək", - deyə o qeyd edib.
Bundan başqa, metropoliten rəsmisi deyib ki, əsas layihələrdən biri "Dərnəgül" elektrik deposunun tikintisidir: "Bu depo bütün standartlara cavab verəcək və Yaşıl xəttin tam müstəqil fəaliyyətini təmin edəcək. Eyni zamanda dayanıqlı enerji təminatı üçün "Nizami" və "Cəfər Cabbarlı" stansiyalarının yaxınlığında iki yeni yarımstansiya inşa olunacaq, Qırmızı xəttin köhnəlmiş dartı yarımstansiyası isə yenilənəcək”.
Onun sözlərinə görə, “İçərişəhər” və “Xətai” stansiyalarında qatarların dönməsi də təmin olunacaq: “Xətlərin ayrılması layihəsinin yekununda hərəkət qrafiki daha optimal qurulacaq, intervallar azaldılacaq və sərnişindaşıma səmərəliliyi artacaq. Nəticədə Qırmızı xətt üzrə intervallar 2 dəqiqəyə, Yaşıl xətt üzrə isə 2 dəqiqə 30 saniyəyə enəcək”.
Mövzunun aktuallığını nəzərə alaraq QSC-yə sorğu verdik. Qurumun Mətbuat Xidmətindən Crossmedia.az-a bildirildi ki, "28 May" stansiyasından qatarların "Dərnəgül" stansiyası istiqamətində hərəkətinə məhdudiyyət "Cəfər Cabbarlı-Nizami" mənzilini birləşdirəcək 200 metrə yaxın tunelin inşası dövründə bağlanılacaq: "Bu işlərə ilin son rübündə başlanılması nəzərdə tutulub. Sərnişinlərin Qırmızı və Yaşıl xətlərdən, həmçinin "28 May" və "Nizami" stansiyalarından bir-birinə keçidin təşkili ilə bağlı əlavə tədbirlərə tam aydınlıq gətirildikdən sonra ictimaiyyətə məlumatlar təqdim ediləcək"..
Aydan Quliyeva
10:57 09.04.2025
Oxunuş sayı: 9609
