Washington Post: İran Azərbaycanda yaşayan ravvinə sui-qəsd hazırlayıb
Azərbaycanda Aşkenazi yəhudilərinin baş ravvini Şneor Seqala qarşı planlaşdırılan sui-qəsdin qarşısı alınıb.
Crossmedia.az bu barədə “The Washington Post”un yaydığı məlumata əsasən xəbər verir.
Mənbənin məlumatına görə, İranın İslam İnqilabı Keşikçiləri Korpusunun (SEPAH) Qüds qüvvələrinə bağlı xüsusi təyinatlı zabit, ravvini öldürmək üçün Gürcüstan vətəndaşı, narkotik alverində şübhəli bilinən Aqil Aslanovu cəlb edib.
Aslanova hədəfin fotoşəkili və təlimatlar təqdim olunub, sui-qəsdi həyata keçirməsi üçün isə ona 200 min dollar təklif edilib.
İddiaya görə, o, İranda SEPAH nümayəndəsi ilə görüşdükdən sonra Azərbaycana qayıdaraq, Ceyhun İsmayılov adlı həmyerlisini də plana daxil edib. Lakin plan hüquq-mühafizə orqanları tərəfindən vaxtında aşkarlanaraq zərərsizləşdirilib. Hər iki şəxs saxlanılıb.
Baş verənlərlə bağlı danışan Şneor Seqal, məlumatı ilk dəfə Azərbaycan mətbuatından öyrəndiyini və hadisəyə baxmayaraq, ölkədə özünü təhlükəsiz hiss etdiyini bildirib.
11:47 06.04.2025
Oxunuş sayı: 10443
