Dərnəgül elektrik deposunun tikintisində yaşıllıqların qorunması ilə bağlı ictimai dinləmə keçirilib
Aprelin 4-də Dövlət Ekoloji Ekspertiza Agentliyinin təşkilatçılığı ilə "Bakı Metropoliteni" QSC tərəfindən Dərnəgül elektrik deposunun tikintisi zamanı ətraf mühitə təsirlərin, o cümlədən layihə altına düşən yaşıllıqların qiymətləndirilməsi üzrə ictimai dinləmə keçirilib. Tədbirdə rəsmi qurumların nümayəndələri, mütəxəssislər, media təmsilçiləri iştirak ediblər. Dövlət Ekoloji Ekspertiza Agentliyinin İdarə Heyəti sədrinin müavini İman Quliyev Dərnəgül elektrik deposunun tikintisi layihəsinin nəqliyyat infrastrukturunun genişləndirilməsi məqsədi daşıdığına diqqət çəkib: “Layihə üzrə yaşıllıqların vəziyyəti və onların qorunması ilə bağlı məlumatlar Dövlət Ekoloji Ekspertiza Agentliyinə təqdim olunub. Yaşıllıqların qorunması və onlara qulluqla bağlı müvafiq monitorinq və nəzarət aparılacaq. Layihə çərçivəsində əsas tələblər deponun yaşıllıq landşaftının mütləq olmasıdır. Bundan əlavə, depodan ağacların Bakı şəhər Yaşıllaşdırma Təsərrüfatı Birliyi tərəfindən xüsusi texnikanın köməyi ilə köçürülməsi planlaşdırılır”.
Daha sonra “Bakı Metropoliteni” QSC-nin Perspektiv inkişaf və əsaslı tikintiyə nəzarət departamentinin rəisi Aftandil Bayramov bildirib ki, elektrik deposunun yerləşəcəyi ərazidə sıfır mayillik vacibdir. Bu səbəbdən həmin ərazidə mövcud olan ağaclar layihəyə uyğun şəkildə ərazidəki digər hissələrə köçürüləcək: “Ağaclar torpaq sahəsinin relyefinə uyğun olaraq köçürüləcək və onlara tam qulluq göstəriləcək. Bununla yanaşı, layihə çərçivəsində 1000-ə yaxın yeni ağacın əkilməsi planlaşdırılır”, – deyə o vurğulayıb.
Qeyd edilib ki, Dərnəgül elektrik deposunun tikintisi Bakı şəhərinin nəqliyyat infrastrukturunun genişləndirilməsi, metro şəbəkəsinin effektivliyinin artırılması və sərnişin axınının tənzimlənməsi məqsədi daşıyır. Layihə həm də paytaxtda ekoloji tarazlığın qorunmasına yönələn tədbirlərlə müşayiət olunur.
Dinləmə zamanı iştirakçılar tərəfindən müxtəlif suallar səsləndirilib, ağacların köçürülməsi, yeni ağacların növləri, landşaft dizaynı və ekoloji monitorinqin tezliyi ilə bağlı məsələlər müzakirə edilib.
17:45 04.04.2025
Oxunuş sayı: 6994
