Azərbaycan xüsusi xidmət orqanlarının əməkdaşları peşə bayramlarını fəxrlə qeyd edirlər
Hər il 28 mart tarixi Azərbaycanda təhlükəsizlik orqanları əməkdaşlarının peşə bayramı kimi qeyd olunur. Bu günün təsis edilməsi Ümummilli Lider Heydər Əliyevin 23 mart 1997-ci il tarixli Sərəncamı ilə gerçəkləşmişdir. Sərəncamla bu sahədə çalışan minlərlə vətənpərvər peşəkarın fəaliyyəti dövlət səviyyəsində rəsmən qiymətləndirilmiş və onların misilsiz xidmətlərinə verilən yüksək dəyər bir daha təsdiqlənmişdir.
Azərbaycan təhlükəsizlik orqanlarının əsası hələ 1919-cu ildə – Azərbaycan Xalq Cümhuriyyəti dövründə qoyulmuş, sonrakı illərdə müxtəlif mərhələlərdən keçərək müasir dövrümüzdə Dövlət Təhlükəsizliyi Xidməti və Xarici Kəşfiyyat Xidməti kimi güclü strukturlar şəklində fəaliyyətini davam etdirmişdir. Bu orqanlar ölkənin milli təhlükəsizliyini təmin etmək, terrorizm, casusluq və digər təhdidlərə qarşı mübarizə aparmaq, eləcə də strateji maraqları qorumaq kimi olduqca vacib və məsuliyyətli missiyanı yerinə yetirirlər.
Hazırda Prezident İlham Əliyevin rəhbərliyi altında bu sahədə mühüm islahatlar həyata keçirilmiş, təhlükəsizlik və kəşfiyyat orqanlarımız yüksək texnologiya, peşəkarlıq və döyüş qabiliyyəti ilə müasir tələblərə cavab verən güclü qurumlara çevrilmişdir. 44 günlük Vətən müharibəsi zamanı bu orqanların nümayiş etdirdiyi peşəkarlıq, əldə olunan strateji məlumatların operativ təhlili və təhlükələrin qabaqlanması, qələbəmizin təmin olunmasında xüsusi rol oynamışdır.
Bu əlamətdar gün münasibətilə Dövlət Təhlükəsizliyi Xidmətinin, Xarici Kəşfiyyat Xidmətinin əməkdaşlarını və bu şərəfli yolda xidmət göstərmiş bütün veteranları ürəkdən təbrik edir, onlara möhkəm can sağlığı, ruhi güc və Vətənə sədaqətli xidmətlərində uğurlar arzulayırıq!
Əminik ki, Azərbaycanın təhlükəsizlik orqanları bundan sonra da dövlətimizin suverenliyini və xalqımızın əmin-amanlığını qorumaq yolunda qətiyyətlə fəaliyyət göstərəcək, hər bir vətəndaşımızın təhlükəsizliyinin təminatçısı olacaqlar!
Ayhan Ağarzayev
11:40 28.03.2025
Oxunuş sayı: 11698
