“Azərbaycan Şimali Makedoniya ilə bu istiqamətdə əlaqələri inkişaf etdirə bilər” - AÇIQLAMA
Şimali Makedoniya prezidenti martın 11-də Azərbaycana ikinci dəfə rəsmi səfər edib. İki ölkə arasında gerçəkləşdirilən əməkdaşlıqla haqqında danışıqlar aparılıb. Bu səfər iki ölkə arasındakı yüksək səviyyəli münasibətlərin möhkəmləndirilməsinin bariz nümunəsidir.
Hər iki ölkə prezidentinin mətbuata verdiyi bəyanatlarda bu mövzunun əhəmiyyəti vurğulanıb.
Bununla bağlı Crossmedia.az-a açıqlama verən Milli Məclisin deputatı Elçin Mirzəbəylinin sözlərinə görə, səfərin prioritet məsələsi Azərbaycanın resursları və bu resursların Avropaya nəqlidir: “ Azərbaycan qazını alan 12 ölkədən 10-u Avropa ölkəsidir. Bu da Avropanın Azərbaycanla sıx əlaqədə olması, həm Azərbaycanla Avropa İttifaqı, həm də Avropanın bütövlükdə qarşılıqlı münasibətlərinin inkişafına işarə edir. Bu həmçinin, ölkəmizin Avropanın enerji təhlükəsizliyindəki mühüm rolunu əks etdirir”.
Millət vəkili qeyd edib ki, görüş siyasi və iqtisadi əlaqələrin genişləndirilməsi üçün geniş imkanlar yaradıb: “Şimali Makedoniya ərazi baxımından kiçik olsa da, Şərqi Avropada strateji əhəmiyyətli mövqeyə malikdir və ölkə mühüm nəqliyyat dəhlizləri üzərində yerləşir.
Bu istiqamətdə bəlli olduğu kimi Azərbaycan da nəqliyyat dəhlizlərinin diversifikasiyasında maraqlıdır. Həmçinin ölkəmizdən önəmli nəqliyyat marşrutları keçdiyi üçün Şimali Makedoniya ilə bu istiqamətdə əlaqələri inkişaf etdirə bilərik”.
E.Mirzəbəyli onu da vurğulayıb ki, yaşıl enerji sahəsində əməkdaşlığın genişləndirilməsi üçün də ciddi perspektivlər mövcuddur: “İki ölkə arasında imzalanan mühüm sənədlər, iqtisadi əlaqələrin inkişafı ilə yanaşı, milli maraqlara söykənən siyasətin beynəlxalq arenada daha yüksək kürsülərə çıxarılmasına da töhfə verəcək.
Həmçinin, bu səfər Azərbaycanla Avropa İttifaqına üzv ölkələr arasındaki əlaqələrin genişləndirilməsi baxımından strateji tərəfdaşlığın yeni mərhələsinə keçidi simvolizə edir”.
Mədinə Cəlilova
17:22 11.03.2025
Oxunuş sayı: 9848
