Rusiya - Ukrayna arasında atəşkəs: Türkiyə mühüm rol oynayacaq
Türkiyənin xarici işlər naziri Hakan Fidan Ankaranın Rusiya – Ukrayna müharibəsinin yaxın vaxtlarda sona çatacağına ümid etdiyini açıqlayıb.
O, bu barədə Qətərin “Al Jazeera” telekanalına verdiyi müsahibəsində bildirib.
“Düzünü desək, Ukraynadakı müharibə ilə bağlı biz onun başa çatması üçün əlamətlər görürük”, – Fidan qeyd edib.
Nazir vurğulayıb ki, Türkiyə yaxın aylarda bu istiqamətdə real addımlar atılmasını gözləyir və əlavə edib: “Yaydan əvvəl biz konkret bir şey görəcəyik”.
Nazir yaxın vaxtlarda böhrandan çıxmağa səbəb ola biləcək addımların atılacağına inandığını söyləyib.
Türkiyənin Rusiya - Ukrayna müharibəsindəki mümkün vasitəçiliyi barədə Crossmedia.az-a danışan türkiyəli siyasi şərhçi, professor Mehmet Yüce qeyd edib ki, Türkiyə Rusiya-Ukrayna müharibəsinin bitməsində mühüm rol oynaya bilər.
Onun sözlərinə görə, Türkiyə müharibənin başlanmasından bu yana hər iki ölkə ilə tərəfsiz bir münasibət yeridərək müharibənin bir an əvvəl dayandırılması üçün güclü səy göstərib: " Hər iki tərəflə görüşə bilən tək lider olaraq, Prezident Rəcəb Tayyib Ərdoğan tərəfləri İstanbulda bir araya gətirib və razılaşmalar üçün ortaq zəmin yaradıb. Lakin bəzi qüvvələrin müdaxiləsi ilə bu razılaşma son anda gerçəkləşməyib. Digər tərəfdən, Türkiyə və BMT Rusiyayla apardıqları uzun müzakirələr nəticəsində tərəflərlə "Taxıl Dəhlizi Sazişi" imzalamağı bacarmış və bu saziş sayəsində dünya üzrə taxıl bazarında sabitlik təmin edilmişdir".
Politoloq bildirib ki, Türkiyənin həm strateji, həm də taktiki səviyyədəki təşəbbüsləri, fəaliyyətləri və əlaqələri ilə tərəflər arasında uzlaşmanın təmin olunmasına yönündə ciddi səy göstərilmişdir: "Lakin, mövcud şəraitin uyğun olmaması səbəbilə indiyə qədər irəliləyiş əldə edilməyib. ABŞ-da Donald Trampın hakimiyyətə gəlməsi ilə münsibətlərin inkişafı istiqamətində yeni dinamika ortaya çıxıb. Bu çərçivədə müvafiq tərəflər arasında dolayı görüşlər başlayıb. Bütün aktorlar bir-biri ilə dialoq qurmağa cəhd ediblər. Bu prosesin atəşkəsə çevrilməsində Türkiyə mühüm rol oynaya biləcək bir mövqedədir. Çünki bölgənin güclü və mühüm ölkəsi olan Türkiyə, hər iki tərəfin də güvəndiyi bir ölkədir.Türkiyənin müharibənin başlanmasından bəri irəli sürdüyü uzlaşma təklifi və ədalətli sülhün nə qədər doğru olduğu bu gün daha yaxşı anlaşılmaqdadır. Türkiyənin vasitəçi olub-olmaması məsələsi tərəf ölkələrinin qərarına və ABŞ-nin oynayacağı rola bağlıdır".
M.Yücenin sözlərinə görə, Türkiyə vasitəçi olub - olmamasından asılı olmayaraq bütün hallarda sülhün həyata keçirilməsi, davamlılığı və atəşkəsin qorunmasında mühüm rol oynayacaq.
Fatimə Məmmədova
16:40 27.02.2025
Oxunuş sayı: 18976
