Azərbaycanın İsveçrə Konfederasiyasındakı səfirliyinin dəstəyi ilə bu ölkənin Soloturn şəhərində fəaliyyət göstərən “Azərbaycan-Türk Mədəniyyət Mərkəzi”ndə Xocalı soyqırımının 33-cü ildönümünə həsr edilmiş anım tədbiri keçirilib.
Crossmedia.az xəbər verir ki, tədbirdə Xocalı soyqırımı qurbanlarının xatirəsi bir dəqiqəlik sükutla yad edilib. Azərbaycan-Türk Mədəniyyət Mərkəzinin rəhbəri Cevzet Aras ən çətin anlarda xalqımızın birləşdiyini və biri-birinə dəstək göstərdiklərini vurğulayıb.
Azərbaycan Respublikasının İsveçrə Konfederasiyasındakı səfiri Fuad İsgəndərov Birinci Qarabağ müharibəsi veteranı kimi, o illərin dəhşətlərindən danışıb, Xocalı soyqırımının şahidi həmin dövrlə bağlı acı xatirələrini bölüşüb. O, qeyd edib ki, tariximizin Xocalı acısı kimi qanlı səhifəsi ilə yanaşı, qürur yaşadan və zəfərlə dolu səhifələri də var. Səfir F. İsgəndərov hal-hazırda Xocalıda baş verən dirçəliş və yenidən qurma layihələrindən danışıb.
Tədbirin sonunda Xocalı soyqırımı və qurbanlarının ruhuna dualar oxunub.
