“Global Media Group”a qarşı növbəti kiberhücum cəhdi olub
"Global Media Group"a qarşı yenə kiberhücum cəhdi olub.
Crossmedia.az xəbər verir ki, bu barədə holdinqin əməkdaşı Turan İbrahimov bildirib.
O qeyd edib ki, “Global Media Group”a daxil olan onlayn resurslara qarşı növbəti genişmiqyaslı kiberhücum həyata keçirilib: “ Bunun nəticəsində “Report.az”, “Oxu.az”, “Media.az”, “Baku TV” və “Baku.ws” saytlarının fəaliyyətində müvəqqəti problemlər yaranıb. Artıq ikinci dəfə baş verən bu kütləvi hücumu dəf etmək üçün təxirəsalınmaz tədbirlər görülüb. Hazırda saytların işinin tam bərpa olunması istiqamətində intensiv iş aparılır. Holdinqin IT komandası təhlükəsizlik tədbirlərini gücləndirərək, sistemin sabitliyini təmin etmək üçün çalışır”.
Jurnalist bildirib ki, qeyd olunan xəbər resurslarında yeni məlumatların yerləşdirilməsinə fevralın 24-dən etibarən başlanılacaq: “Bu müddət ərzində oxucularımız bütün yenilikləri sosial media platformalarımız vasitəsilə izləyə bilərlər.
Xüsusilə vurğulamaq istərdik ki, bu adi DDoS hücumu deyil, peşəkar şəkildə təşkil olunmuş, yüksək səviyyədə planlaşdırılmış kiberhücumdur. Hadisə ilə bağlı aidiyyəti dövlət qurumlarına rəsmi məlumat verilib və məsələ ciddi nəzarətdə saxlanılır.
Redaksiya heyətimiz tam gücü ilə fəaliyyətini davam etdirir və tezliklə saytlarımızın işini tam bərpa edəcəyik!”.
Qeyd edək ki, fevralın 20-də “Global Media Group”a qarşı kiberhücum olub.
21:54 22.02.2025
Oxunuş sayı: 12445
