İsrail növbəti mərhələdə 620 fələstinlini azad edəcək
Qəzzada atəşkəs və məhbus mübadiləsi razılaşması çərçivəsində HƏMAS-ın bu gün azad etdiyi 6 israilli məhbusun qarşılığında İsrailin 620 fələstinli məhbusu azad edəcəyi bildirilib.
Crossmedia.az xarici mətbuata istinadən xəbər verir ki, bu mərhələdə azad ediləcəklər arasında ömürlük və ya uzunmüddətli həbs cəzasına məhkum edilmiş 151 fələstinli məhbus da var.
Məhbuslardan 95-i HƏMAS, 40-ı Fəth, 12-si İslami Cihad və 4-ü Fələstinin Azadlığı Xalq Cəbhəsinin üzvüdür.
Həmçinin 2023-cü il oktyabrın 7-dən sonra Qəzza zolağından götürülən 24-ü qadın və uşaq olmaqla, daha 469 fələstinli məhbusun Qəzzada azad ediləcəyi bildirilib.
Digər tərəfdən, Fələstinli Əsirlər Dərnəyi bəyanat yayaraq, Şalit razılaşması əsasında azad edilən və daha sonra İsrail tərəfindən yenidən həbs edilən 41 fələstinlinin məhbus mübadiləsinin yeddinci turunda sərbəst buraxılacağını açıqlayıb.
Xatırladaq ki, məhbus mübadiləsinin yeddinci mərhələsi çərçivəsində Qəzza zolağında saxlanılan 6 israilli məhbus bu gün azad edilərək Beynəlxalq Qızıl Xaç qruplarına təhvil verilib.
Aybəniz Səfərova
21:10 22.02.2025
Oxunuş sayı: 3915
