“Azərbaycanın mədəniyyət siyasəti və media” mövzusunda seminar təşkil olunub
Fevralın 21-də Vaqif Mustafazadə adına 2 nömrəli Uşaq İncəsənət Məktəbində Mədəniyyət Nazirliyi və Medianın İnkişafı Agentliyinin birgə təşkilatçılığı ilə “Azərbaycan Respublikasının mədəniyyət siyasəti və media” mövzusunda maarifləndirici seminar keçirilib.
Crossmedia.az xəbər verir ki, tədbirin məqsədi mədəniyyət sahəsində fəaliyyət göstərən qurumların media ilə səmərəli kommunikasiyasının qurulması, informasiya yayımı prosesində müasir metodların tətbiqi və strateji kommunikasiya bacarıqlarının artırılması olub.
Seminarda Medianın İnkişafı Agentliyinin Kommunikasiya şöbəsinin müdiri - mətbuat katibi Səidə Şəfiyeva “Mədəniyyət qurumlarının fəaliyyətinin mediada səmərəli kommunikasiyasının təşkili” mövzusunda təqdimatla çıxış edib. O, mədəniyyət sahəsinin cəmiyyətimizin şüurunu, dəyərlərini və tarixi yaddaşını özündə birləşdirən vacib sahələrdən biri olduğunu bildirib, bu dəyərlərin düzgün çatdırılması və beynəlxalq aləmdə tanıdılması baxımından media və kommunikasiyanın əvəzolunmaz bir vasitə kimi rolunu vurğulayıb.
“Əvvəllər mədəniyyət qurumları əsasən ənənəvi vasitələrlə – qəzetlər, jurnallar, televiziya proqramları və kitablarla informasiya yayırdısa, bu gün rəqəmsal dövr dövlət qurumları üçün tamamilə yeni imkanlar açır. İndi biz sosial media platformaları, virtual texnologiyalar və rəqəmsal resurslar vasitəsilə mədəniyyət tədbirlərini minlərlə, hətta milyonlarla insana çatdırmaq imkanına malikik. Bu dəyişikliklər göstərir ki, keçmişdə statik və birtərəfli olan kommunikasiya artıq daha dinamik, rəqəmsal və interaktiv xarakter daşıyır”, - deyə S.Şəfiyeva qeyd edib.
Onun sözlərinə görə, əvvəllər daha məhdud auditoriyaya informasiya təqdim edilirdisə, indi sosial media və digər rəqəmsal platformalar vasitəsilə bu proses daha geniş miqyasda həyata keçirilə bilər.
Səidə Şəfiyeva, həmçinin media və mədəniyyət qurumları arasında əməkdaşlığın əhəmiyyətindən, informasiya siyasətinin qurulmasında yeni texnologiyaların rolundan və bu sahədə beynəlxalq təcrübədən danışıb.
Medianın İnkişafı Agentliyinin Media dəstək layihələri, strateji planlaşdırma və informasiya texnologiyaları departamentinin direktoru Ləman İsgəndərova “Media savadlılığı: başlıca prinsipləri, hədəf qrupları və perspektivləri” mövzusunda çıxış edərək media savadlılığının cəmiyyət üçün əhəmiyyətindən danışıb. O qeyd edib ki, müasir dövrdə media savadlılığı informasiyanın düzgün qavranılması və dezinformasiyadan qorunmaq üçün vacib bacarıqlardan biridir. Çıxışında bu sahədə beynəlxalq təcrübəyə də toxunan L.İsgəndərova, medianın müxtəlif hədəf qruplarına uyğun strategiyalar qurmasının zəruriliyini vurğulayıb.
“Redaksiya siyasəti və jurnalistlərin peşə davranış qaydaları” mövzusunda çıxış edən Medianın İnkişafı Agentliyinin media təhlil şöbəsinin müdiri Səbinə Seyidova jurnalist etikası və redaksiya siyasətinin peşəkar media mühitinin formalaşmasında əsas şərtlərdən olduğunu bildirib. O vurğulayıb ki, jurnalistlər informasiya əldə edərkən və yayarkən obyektivlik, dəqiqlik və qərəzsizlik prinsiplərinə əməl etməlidirlər. S.Seyidova, həmçinin medianın cəmiyyətə təsiri və peşəkar jurnalistikanın nüfuzunun qorunması üçün etik qaydalara riayət etməyin vacibliyindən bəhs edib.
Bakı Dövlət Universitetinin jurnalistika fakültəsinin dosenti, elmi işlər üzrə dekan müavini Sevinc Əliyeva “Milli Mətbuat – 150. Azərbaycan publisistikasında qadın hüquqları uğrunda mübarizə və gender bərabərliyi məsələləri” mövzusunda çıxış edərək, bu sahədə aparılan müzakirələrin əhəmiyyətindən danışıb. O, XIX əsrin sonu - XX əsrin əvvəllərindən etibarən milli mətbuatda qadınların təhsili, ictimai həyatda iştirakı və hüquqlarının müdafiəsi istiqamətində müzakirələr aparıldığını qeyd edib. Həmçinin bu mövzunun günümüzdə də aktuallığını qoruduğunu və gender bərabərliyi məsələlərinin mediada daha geniş işıqlandırılmasının vacibliyini vurğulayıb.
Sonda iştirakçıları maraqlandıran suallar cavablandırılıb.
Sual-cavab sessiyası zamanı iştirakçılar mədəniyyət qurumlarının media ilə daha səmərəli əməkdaşlıq imkanları, sosial mediada düzgün informasiya idarəetməsi və strateji kommunikasiya məsələləri barədə müzakirələr aparıblar.
Qeyd edək ki, bu cür tədbirlər mədəniyyət və media sahələri arasında əməkdaşlığın inkişafı və ictimaiyyətin maarifləndirilməsi baxımından mühüm əhəmiyyət daşıyır.
18:14 21.02.2025
Oxunuş sayı: 11163
