“NATO Ukraynanın taleyi ilə bağlı konkret qərar qəbul edəcək”- RƏY
Kremlin sözçüsü Dmitri Peskov Avropanın Ukraynaya hərbi kontingent göndərmək planlarından narahat olduqlarını bildirib. O, NATO qoşunlarının Ukraynaya yerləşdirilməsinin Rusiya üçün qəbuledilməz olduğunu vurğulayıb.
“The Daily Telegraph”ın məlumatına görə, Avropa ölkələri Vaşinqtona 30 min hərbçi göndərməyi təklif etməyi planlaşdırır.
Avropa, həqiqətən, dediyini edəcəkmi? Əgər edəcəksə, Rusiyanın buna münasibəti necə olacaq.
Hərbi ekspert Üzeyir Cəfərov bu barədə Crossmedia.az-ın suallarını cavablandırıb.
O, qeyd edib ki, müharibə davam etdiyi müddətdə heç bir ölkə öz hərbçilərini rəsmi razılaşma olmadan göndərmək niyyətində deyil: “ Lakin ABŞ-nin Ukraynanı qurban verəcəyi və Rusiya Prezidenti Vladimir Putinlə razılaşacağı ehtimalı Avropanı hərəkətə keçməyə vadar edə bilər. ABŞ Prezidenti Donald Trampın müharibəyə biznesmen gözü ilə baxması, Ukraynanı güzəştə getmək istəməsi Qərbdə narahatlıq doğurur. O, Ukraynada Rusiyaya uyğun marionet bir rejimin qurulmasını istəyir. Lakin nə Trampın, nə də Putinin planları gerçəkləşəcək. Ukrayna xalqı öz müqavimətini davam etdirəcək və Avropa Ukraynanın təhlükəsizliyini təmin etmək üçün daha aktiv addımlar atacaq".
Ü. Cəfərov vurğulayıb ki, gələcək günlərdə NATO daxilində bu məsələ ilə bağlı daha konkret qərarların qəbul ediləcəyi gözlənilir: “Hər halda Ukraynanın taleyini onun öz xalqı müəyyən edəcək və Rusiya bu prosesə mane ola bilməyəcək. Müharibədən sonra beynəlxalq qüvvələrin Ukraynaya yerləşdirilməsi məsələsi gündəmdədir. Artıq Niderland və Fransa qoşun ayırmağa hazır olduqlarını bəyan ediblər. Kremlin sözçüsü Dmitri Peskov isə Avropa qüvvələrinin Ukraynada yerləşdirilməsinin qəbuledilməz olduğunu bildirib”.
Ekspertin fikrincə, Ukraynanın taleyini yalnız Ukrayna xalqı müəyyənləşdilməlidir: “ABŞ və Rusiya arasında danışıqlar aparılsa da, Ukraynanın razılığı olmadan heç bir qərar reallaşa bilməz. Hazırda Avropa və NATO daxilində bu məsələ ətrafında gərgin müzakirələr gedir”.
Xumar Əhmədova
16:49 20.02.2025
Oxunuş sayı: 11956
