Zelenski: “Müharibənin bitməsini istəyirik, amma təhlükəsizlik zəmanətləri ilə”
Ukrayna Prezidenti Vladimir Zelenski rəsmi səfər çərçivəsində Ankarada olub və ölkəsinin yeni səfirlik binasının açılışında iştirak edib.
Crossmedia.az türk mətbuatına istinadən xəbər verir ki, o, çıxışında Ukraynanın sülh istədiyini, lakin bunun təhlükəsizlik zəmanətləri əsasında olmasının vacibliyini vurğulayıb.
Zelenski Türkiyə Prezidenti Rəcəb Tayyib Ərdoğanla görüşündə müharibənin həlli, məhbus mübadiləsi və ərzaq təhlükəsizliyi mövzularını müzakirə etdiklərini bildirib.
O, Türkiyənin vasitəçilik roluna və Ukraynalıların vətənə qayıtması üçün göstərdiyi dəstəyə xüsusi diqqət çəkib.
Ukrayna lideri qida dəhlizinin yaradılmasında Türkiyənin səylərini yüksək qiymətləndirib, lakin Rusiyanın bu prosesi pozduğunu qeyd edib.
O, Ukraynanın ərzaq məhsullarının Afrika və Suriya da daxil olmaqla ehtiyacı olan ölkələrə göndərilməsinin vacibliyini vurğulayıb.
Zelenski çıxışında Ukraynanın ərazi bütövlüyünə sadiq olduğunu və müharibənin başa çatması üçün ABŞ, Avropa Birliyi və Türkiyə də daxil olmaqla beynəlxalq təhlükəsizlik zəmanətlərinin önəmli olduğunu qeyd edib.
O, həmçinin Ukraynanın Ankaradakı yeni səfirlik binasının açılışını “çox simvolik” adlandırıb və binanın inşasında əməyi keçənlərə təşəkkür edib. Yeni səfirin Neriman Cəlal olacağını elan edən Zelenski, Ukrayna və Krım-tatar diasporunun bu prosesdəki roluna da toxunub.
Aybəniz Səfərova
14:11 18.02.2025
Oxunuş sayı: 8817
